Зеленски до Путин: Сакавте да ја земете цела Украина, наместо тоа ги изгубивте рафинериите и флотата

Украинскиот претседател Володимир Зеленски упати остри пораки до рускиот претседател Владимир Путин во видеообраќањето по повод 35-годишнината од независноста на Украина, повикувајќи ги САД, Европа и Кина да го зголемат притисокот врз Москва и да ја принудат да седне на преговарачка маса.

Зеленски порача дека Украина е подготвена да ја заврши војната, но нема да прифати услови кои би значеле откажување од нејзината територија или исполнување на барањата на Москва.

— реклама —

„Верувам дека Америка ќе ги надмине сите свои противречности и фобии во врска со Русија. Русите мора да седнат на преговарачка маса. Конечно мора да се воведат санкции што ќе ги натераат да завиваат“, рече Зеленски.

Тој ја повика Европа да биде обединета, амбициозна и храбра, а од Кина побара да заземе појасен став во однос на руската агресија.

— реклама —

„Кина мора да одговори и да ја докаже својата амбиција да биде еден од најголемите светски лидери, не само економски и технолошки, туку и во цивилизациски поглед, со тоа што јасно ќе испрати порака дека ниту еден диктатор нема право да ја загрозува планетата со своите застарени боеви глави“, порача украинскиот претседател.

Зеленски истакна дека на Украина треба да ѝ се обезбеди сè што ѝ е потребно за да ја заврши војната побрзо отколку што, како што рече, Путин би можел да започне нова.

Обраќајќи му се директно на рускиот претседател, Зеленски рече:

— реклама —

„Сакавте да ја земете цела Украина, наместо тоа ги изгубивте вашите рафинерии за нафта, вашата флота, вашиот профит, цела генерација што ја испративте во кланица.“

Тој додаде дека Украина нема да дозволи Русија да ја убеди Европа и остатокот од светот дека отстапувањето на Донбас би било доволно за да заврши војната.

Во меѓувреме, на Денот на независноста на Украина, Европската комисија одобри дополнителни 6,1 милијарда евра финансиска помош за земјата. Средствата се наменети за воздушна одбрана, ракети, муниција и радари.

Од Европската комисија соопштија дека новото финансирање доаѓа во период кога Русија ги засилува нападите врз Украина со балистички ракети и беспилотни летала.