Зеленски ја обвини Русија за прекршување на енергетското примирје најавено од Трамп

Украина ја обвини Русија дека го прекршила енергетското примирје што го најави американскиот претседател Доналд Трамп, според кое Москва треба да ги пласира своите резерви на дизел на светскиот пазар. Киев тврди дека руските напади врз украинските енергетски капацитети продолжиле и по објавувањето на договорот, додека европските министри за надворешни работи изразија сомнеж дека Москва ќе го почитува примирјето.

Украинскиот претседател Володимир Зеленски изјави дека Русија продолжила со нападите набргу откако Трамп го објавил договорот на социјалните мрежи.

— реклама —

„Минатата ноќ руските рафинерии за нафта не беа во пламен, но на полноќ руски дрон „Шахед“ со млазен погон погоди објект за производство на гас во Украина. Имаше и руски напад врз обична бензинска пумпа со неколку дронови, а екипите за поправки сè уште работат на санирање на штетите од вчерашните напади. Значи, имаше руски прекршувања на енергетското примирје што го најави претседателот Трамп“, рече Зеленски.

Шефицата на европската дипломатија, Каја Калас, ја поздрави можноста за енергетско примирје, но оцени дека засега нема показатели оти Русија планира да го почитува.

— реклама —

Европската Унија дополнително ја прошири листата на санкции против повеќе од 1.600 лица и правни субјекти обвинети за поддршка на руската војна против Украина. Повеќе од половината од нив се поврзани со производството на балистички проектили.

„Не треба да заборавиме дека Русија ја започна оваа војна. Треба да извршиме притисок врз Русија за да ја прекине војната, бидејќи ако Русија запре, Украинците нема да мора да преземаат никакви чекори за да ја бранат својата земја. Што се однесува до ваквиот договор, секако, се надеваме дека примирјето ќе се одржи, но досега не видовме дека тоа се почитува“, изјави Калас.

— реклама —

Европските министри за надворешни работи повикаа на засилување на притисокот врз Москва. Естонскиот министер за надворешни работи, Маргус Цахна, оцени дека договорот за дизел нема значително да влијае врз цените на нафтата и горивата, туку дека е поврзан и со внатрешнополитичката состојба во САД пред претстојните избори за Конгресот.

„Не мислам дека овој договор за дизел-гориво во реалноста ќе промени нешто во однос на цените на нафтата или дизелот на пазарот. Сметам дека тој е многу повеќе поврзан со внатрешната политичка ситуација во САД, со оглед на тоа што се приближуваат нивните избори на половина од мандатот на претседателот“, рече Цахна.

Трамп во неделата објави дека примирјето стапило во сила веднаш, додавајќи: „Не го прекршувајте!“

Според најавата, првата фаза од договорот треба да ги опфати рафинериите за нафта, што, според текстот, му оди во прилог на Русија. Украина има една рафинерија, додека Русија располага со 32 големи рафинерии.