Американскиот претседател Доналд Трамп упати порака до украинскиот претседател Володимир Зеленски и до украинскиот народ по повод Денот на независноста на Украина, истакнувајќи ја отпорноста на земјата и потребата од постигнување траен мир.
Зеленски ја објави честитката на социјалната мрежа „Икс“, оценувајќи ја како „топла и охрабрувачка“. Во пораката Трамп ја нагласил долгогодишната врска меѓу САД и Украина и посочил дека Вашингтон се восхитува на истрајноста на украинскиот народ.
„Благодарение на храбрите, смелите и талентираните луѓе, изградивте голема земја“, навел Трамп, додавајќи дека САД ги почитуваат жртвите што ги поднесе Украина и остануваат уверени во нејзината иднина како суверена и просперитетна држава.
Американскиот претседател воедно повикал моментот да се искористи за завршување на конфликтот и воспоставување „траен и долгорочен мир“ кој би ѝ овозможил на Украина да го искористи својот потенцијал во иднина.
Зеленски му се заблагодарил на Трамп за честитката, но во својата реакција повторно го истакнал значењето на американската воена поддршка, особено кога станува збор за пресретнувачките ракети за системите за противвоздушна одбрана „Патриот“.
Тој порача дека зборовите на Трамп, заедно со звукот на лансирањето на ракетите „Патриот PAC-3“, даваат надеж дека украинските животи можат да бидат заштитени од руските напади и дека може да се постигне мир.
Во меѓувреме, европските сојузници разгледуваат можноста следниот состанок на Коалицијата на волни да се одржи во септември, на маргините на Генералното собрание на ОН, при што една од темите би била обезбедувањето дополнителни пресретнувачки ракети „Патриот“ за Украина.
Зеленски претходно предупреди дека на Украина во текот на зимата би ѝ биле потребни до 360 пресретнувачки ракети „Патриот“ за зајакнување на противвоздушната одбрана.
