Зеленски: Нема да дозволиме Путин да победи, но одлуките на Трамп му носат пари за војната

Украинскиот претседател Володимир Зеленски изјави дека несогласувањата со американскиот претседател Доналд Трамп не се од лична природа, но предупреди дека одредени одлуки на Вашингтон можат директно да ѝ помогнат на Русија да ја продолжи војната против Украина.

Во интервју за Си-ен-ен, Зеленски порача дека неговата земја нема да се откаже од своите принципи, и покрај сè посложените односи со американската администрација.

„Ќе преживееме и ќе останеме силни. Ќе направиме сè за да го приближиме мирот, но нема да дозволиме Путин да победи во оваа војна“, изјави Зеленски во разговорот со новинарката Кристијан Аманпур.

Тој нагласи дека не сака лична конфронтација со Трамп.

— реклама —

„Овде не станува збор за личности. Ова не е нешто лично меѓу мене и претседателот Трамп“, рече украинскиот претседател.

Сепак, Зеленски изрази незадоволство од американската политика кон Москва, особено од договорот за испорака на руски дизел во САД и од изземањето на Русија од новите санкции предвидени во американскиот Конгрес.

„Тоа само ќе му донесе на Путин многу повеќе пари за оваа војна. Затоа сум против“, изјави Зеленски, додавајќи дека има обврска јавно да зборува за одлуките што ја загрозуваат слободата на Украина.

Во анализа за Си-ен-ен, политичкиот аналитичар Стивен Колинсон оценува дека личните односи меѓу Трамп, Зеленски и рускиот претседател Владимир Путин имаат сè поголемо влијание врз американската надворешна политика.

— реклама —

Колинсон посочува дека Трамп во последниот период донел повеќе одлуки што, според критичарите, одат во прилог на Москва. Меѓу нив ги наведува поканата до Путин за самитот на Г20, разгледувањето можност за разговори со Русија и Кина за завршување на војната без учество на Украина, како и одбивањето да се испорачаат дополнителни ракети за украинските противвоздушни системи „Патриот“.

Посебно внимание предизвикал договорот за руски дизел, за кој критичарите предупредуваат дека би можел да донесе милијарди долари во руската економија. Истовремено, Трамп побарал Украина да ги запре нападите врз руските рафинерии, кои Киев ги смета за важен дел од својата стратегија за ослабување на руските воени капацитети.

Украинските власти тврдат и дека продолжуваат проблемите со пристапот до воената верзија на сателитската мрежа „Старлинк“, што ја ограничува ефикасноста на нивните беспилотни летала. Засега не е утврдено кој е одговорен за проблемите, а Трамп негира вмешаност.

И покрај несогласувањата, во текот на неделата се појавиле нови дипломатски иницијативи. Според информациите што ги пренесува Си-ен-ен, Русија по посетата на американскиот претставник Стив Виткоф на Санкт Петербург се согласила да учествува во трилатерални разговори со САД и Украина.

Зеленски повторно предложил замрзнување на постојните линии на фронтот како основа за прекин на огнот и почеток на дипломатско решавање на конфликтот.

— реклама —

Сепак, почетокот на техничките разговори се очекува дури во средината на ноември, а остануваат сериозни разликите околу територијалните прашања и безбедносните гаранции за Украина.

Според анализата на Колинсон, Москва се обидува преку преговорите да добие стратешки важни територии во источниот дел на Донбас што руската војска не успеала да ги освои.

Зеленски ја отфрли можноста Украина да прифати такви територијални отстапки.

„Многу луѓе загинаа бранејќи ја таа земја, нашата независност и нашата држава“, изјави тој.

Украинскиот претседател смета дека Путин не покажува искрена подготвеност за мир, туку се обидува да ги искористи преговорите за остварување на своите цели.

„Путин си игра. Тажно е што си игра со животите на другите луѓе“, рече Зеленски.

Колинсон заклучува дека Зеленски се наоѓа во исклучително тешка позиција, бидејќи мора да ги брани украинските интереси, а истовремено да ја зачува соработката со американскиот претседател, од чија администрација Украина и понатаму во голема мера зависи.

Според оценката на аналитичарот, досегашните отстапки на Трамп кон Путин не донеле значаен напредок кон мирот, додека Русија продолжува со нападите врз украинските градови.