Најголемата московска рафинерија за нафта ја прекина работата по синоќешниот украински напад со дронови, тврдат два извори запознаени со ситуацијата.
Според нив, во нападот за кој одговорност ја презеде Украина, избувнал пожар и бил оштетен примарниот погон CDU-6, чиј дневен капацитет за преработка изнесува околу 21.400 тони нафта, што претставува повеќе од половина од вкупниот капацитет на рафинеријата.
Изворите наведуваат дека се очекува рафинеријата наскоро да продолжи со работа преку друг погон, кој може да преработува околу 18.800 тони нафта дневно.
Иако руските служби за итни случаи претходно соопштија дека пожарот е изгаснат и дека не влијаел врз работата на објектот, градоначалникот на Москва, Сергеј Собјанин, потврди дека постројката претрпела оштетувања.
Рафинеријата, која е во сопственост на „Газпромњефт“, се наоѓа во југоисточниот дел на Москва и е еден од главните извори за снабдување на руската престолнина со гориво.
Украинскиот претседател Володимир Зеленски им се заблагодари на припадниците на украинските сили кои учествувале во нападот.
„Овој пат Московската област го почувствува дострелот на украинските далекусежни способности. Погодена е рафинерија на оддалеченост од 500 километри. Ова е праведен одговор на руските напади и на одолговлекувањето на војната“, изјави Зеленски.
