Украинскиот претседател Володимир Зеленски ја обвини Русија дека во нападите врз Украина користи севернокорејски ракети, предупредувајќи дека воената соработка меѓу Москва и Пјонгјанг претставува опасност и пошироко.
Зеленски изјави дека во руските напади врз Запорожје биле употребени балистички ракети од Северна Кореја. Во нападите загинале најмалку шест лица, а 19 биле повредени, пренесува Би-Би-Си.
Во исто време, Украина извршила напади врз цели во Русија. Во Воронеж биле погодени магацини на онлајн трговецот „Вајлдберис“, додека претходниот ден во украински напади со беспилотни летала врз Татарстан загинале најмалку 13 лица, меѓу кои и едно дете.
Во видеообраќање Зеленски рече дека Русија „не може да води војна без засилување од Северна Кореја“, додавајќи дека употребата на севернокорејски ракети и војници ѝ овозможува на Пјонгјанг да ги усовршува своите способности и да ги открива слабостите во сопствената воена опрема.
Украинскиот претседател воедно го поздрави и нападот врз руска петрохемиска фабрика во западен Сибир, кој го оцени како значајно достигнување на украинските сили.
Зеленски и претходно ја обвинуваше Русија дека добива воена помош од Северна Кореја. За време на викендот тој предупреди дека до 50.000 севернокорејски војници се испраќаат за да се борат на страната на руските сили.
