Зеленски: Украинските ракети и дронови ќе можат да погодуваат цели уште подлабоко на руска територија

Украина работи на проширување на досегот на своите ракети и беспилотни летала, со цел да може да погодува цели уште подлабоко на руска територија, соопшти украинскиот претседател Володимир Зеленски.

— реклама —

По добивањето извештај за нападите од долг дострел во септември и октомври, Зеленски објави дека руските цели од Јамал до Западен Сибир веќе се наоѓаат во дострелот на украинските сили.

— реклама —

„Секој руски напад врз нашите градови и заедници секогаш наидува на целосно оправдан одговор. Работиме на тоа нашите дронови и ракети да можат да досегаат уште подалеку на руска територија“, напиша Зеленски на Телеграм, пренесе УНИАН.

Тој посочи дека Украина планира да ги прошири единиците за напади од долг дострел, користејќи ги капацитетите на Службата за безбедност на Украина, особено Центарот за специјални операции „Алфа“, разузнавачките служби и другите составни делови на украинските одбранбени сили.

— реклама —

Зеленски оцени дека украинските капацитети за напади од голема далечина се една од гаранциите за зачувување на независноста на земјата за време на војната, но и за нејзината долгорочна безбедност по завршувањето на судирот.

Тој истовремено нагласи дека паузата во нападите врз руските нафтени рафинерии е завршена.