Загина вработен во нуклеарната централа „Запорожје“ при напад со дрон

Напад со беспилотно летало врз нуклеарната централа „Запорожје“ во Украина го однесе животот на еден од вработените, соопшти Меѓународната агенција за атомска енергија (МААЕ).

— реклама —

Загинатиот работел како заварувач во централната работилница за поправки, објави агенцијата на социјалната мрежа Икс.

— реклама —

Генералниот директор на МААЕ, Рафаел Гроси, оцени дека секој напад врз персоналот на нуклеарна централа е неприфатлив и ги повика завојуваните страни да покажат максимална воздржаност за да се спречи опасност од нуклеарна несреќа.

Агенцијата не соопшти кој стои зад нападот ниту дали бил извршен од руските или од украинските сили.

— реклама —

Нуклеарната централа „Запорожје“, најголема во Европа, има шест реактори и се наоѓа под руска контрола од почетокот на војната во Украина. Иако реакторите се исклучени, нивното постојано ладење е неопходно за безбедноста. МААЕ има постојан тим во централата кој ја следи состојбата.

Во меѓувреме, во други напади во Украина вчера загинале најмалку 20 лица. Четиринаесет лица го загубиле животот во руски напад со дрон врз железничка станица во Днипро. Во Киев, во напад со руски балистички ракети загинало едно лице, додека во Чернигов животот го загубиле две 15-годишни девојки. Уште три лица загинале во Кременчук.