Земјотрес од 7,1 степени во Јапонија: Прекинат железничкиот сообраќај, предупредување за цунами

Силен земјотрес со јачина од 7,1 степен според Рихтеровата скала денеска го погоди јапонскиот остров Кјушу, со епицентар во префектурата Кумамото, соопшти Јапонската метеоролошка агенција.

— реклама —

По земјотресот беше издадено предупредување за можно цунами, при што се очекуваат бранови високи до еден метар долж делови од крајбрежјето. Властите ги повикаа жителите да се оддалечат од брегот и да ги следат упатствата на надлежните служби.

— реклама —

Јапонската влада активираше итни предупредувања за повеќе префектури на островот Кјушу, меѓу кои Кумамото, Нагасаки, Кагошима, Фукуока, Сага, Оита и Мијазаки.

— реклама —

Од безбедносни причини привремено беше прекинат железничкиот сообраќај, вклучително и дел од линиите на брзите возови „Шинкансен“, додека надлежните служби вршат проверки на инфраструктурата. Во близина на погоденото подрачје се наоѓаат и нуклеарните централи Сендаи и Генкаи, а според првичните информации не се регистрирани неправилности во нивното работење.

Засега нема информации за жртви или поголеми материјални штети, а властите предупредуваат дека се можни дополнителни потреси во наредниот период.