Најмалку 235 лица загинаа, а повеќе од 4.300 се повредени откако два силни земјотреси ја погодија Венецуела во близина на главниот град Каракас. Спасувачките екипи и натаму ги пребаруваат урнатините во потрага по преживеани, додека властите предупредуваат дека бројот на жртвите може дополнително да се зголеми.
Според податоците на Американскиот геолошки институт (USGS), првиот земјотрес бил со јачина од 7,2 степени, а само неколку секунди подоцна следувал уште посилен потрес со јачина од 7,5 степени. Двата земјотреси биле плитки, што дополнително го зголемило нивното разорно дејство.
Најтешко погодени се Каракас и крајбрежниот град Ла Гваира, каде што повеќе згради се урнати или сериозно оштетени. Според официјалните информации, повеќе од 250 објекти се уништени или претрпеле големи оштетувања. Меѓу нив е и хотел на десет ката во Ла Гваира, кој целосно се урнал.
Властите прогласија вонредна состојба, а неколку држави веќе најавија помош за погодените подрачја. Соединетите Американски Држави ветија помош од 150 милиони долари и испраќаат транспортни авиони и бродови за поддршка на спасувачките операции.
Спасувачките екипи работат непрекинато, а од урнатите згради и понатаму се слушаат повици за помош. Во делови од земјата продолжуваат и последователните потреси, при што досега се регистрирани најмалку 30.
Покрај Каракас и Ла Гваира, значителни штети се пријавени и во државите Трухиљо, Јаракуј, Карабобо, Арагуа и Миранда. Главниот меѓународен аеродром во Маикетиа е затворен поради сериозни оштетувања.
Американскиот геолошки институт предупреди дека постои можност бројот на жртвите значително да се зголеми, оценувајќи дека катастрофата е широко распространета и со сериозни последици за населението.
