Италијанска туристка е тешко повредена на грчкиот остров Скијатос, откако била погодена од силниот воздушен млаз од моторите на патнички авион кој полетувал.
Станува збор за 52-годишна жена, која по несреќата најпрво била пренесена во болница на островот. Поради сериозноста на повредите на главата, таа потоа со воздушен транспорт била префрлена во болница во Волос, на грчкото копно.
Точните околности под кои дошло до несреќата засега не се познати.
Аеродромот на Скијатос е познат по тоа што пистата се наоѓа веднаш до морето, поради што голем број туристи се собираат покрај оградата за одблизу да ги гледаат авионите при слетување и полетување.
Сепак, ваквото набљудување може да биде опасно. Воздушниот млаз од моторите на авионите при полетување е исклучително силен и може да ги собори луѓето, како и да исфрли предмети, при што може да дојде до сериозни повреди.
