„Фолксваген“ би можел да укине до 140.000 работни места во рамките на големиот план за реструктурирање, со кој германскиот автомобилски гигант сака да ги намали трошоците и да ја зголеми ефикасноста.
Според достапните податоци, групацијата „Фолксваген“ има околу 629.000 вработени ширум светот, додека „Тојота“ вработува околу 391.000 луѓе. И покрај тоа што има речиси 240.000 вработени помалку, јапонскиот производител во првата половина од годината испорачал 5,39 милиони возила, наспроти 4,13 милиони на „Фолксваген“.
Како што наведува „Дојче веле“, споредбата не е целосно директна, бидејќи „Фолксваген“ и натаму голем дел од производството, развојот и инженерингот ги извршува во рамките на сопствениот систем. Иако овој модел долго време претставувал предност, денес создава високи оперативни трошоци.
Покрај „Фолксваген“, и други германски производители ги приспособуваат своите стратегии на променетите услови на пазарот. „БМВ“ планира да намали околу 8.000 работни места, додека „Порше“ најави укинување на дополнителни 5.000 работни места во Германија до 2035 година.
„Мерцедес-Бенц“, пак, покрај доброволното намалување на бројот на вработени, дел од производството на своите најпродавани модели го префрла во Унгарија, каде што трошоците за работна сила се значително пониски.
Автомобилската индустрија во последните години се соочува со засилена конкуренција од кинеските производители, послаба побарувачка за електрични возила, повисоки цени на енергијата, американски царини и геополитички неизвесности.
