Десетгодишно дете било вмешано во вооружен напад кај Обреновац, Србија, откако полицијата го привела неговиот 44-годишен татко, осомничен дека го натерал синот да пука во 25-годишен деловен партнер.
Инцидентот се случил во дворот на црква во село во близина на Обреновац, во текот на вчерашната вечер околу 21 часот. Според сомненијата на истрагата, таткото во текот на расправијата извадил пиштол, му го предал на детето и го принудил да пука кон младиот човек.
Дваесет и петгодишникот бил погоден во рацете и пренесен во болница. Според досегашните информации, неговата состојба е стабилна и е надвор од животна опасност.
Како можен мотив за конфликтот се наведуваат нерешени финансиски односи поврзани со заедничкиот бизнис со сеча и продажба на дрва.
На местото на настанот се наоѓал и свештеникот, кој, според сведоштвата пренесени од српските медиуми, бил во шок поради случувањата. Тој изјавил дека првично помислил оти автомобилот што пристигнал во црковниот двор припаѓа на верници кои дошле да запалат свеќа.
Случајот предизвикал вознемиреност и меѓу локалното население. Жителите велат дека им било необично возило да пристигне во црковниот двор доцна навечер, додека за повредениот млад човек имаат пофални зборови и го опишуваат како вреден и примерен.
Полицијата брзо го обезбедила подрачјето и го привела осомничениот. Пронајдениот пиштол е предаден на вештачење, а на 10-годишното дете му е обезбедена заштита и соодветна помош.
Според информациите од истрагата, 44-годишниот маж и претходно бил пријавуван за различни кривични дела, меѓу кои недозволено поседување оружје, кражба на дрва и насилничко однесување, како и за сообраќајни прекршоци и несреќи.
На осомничениот му е одредено задржување до 48 часа, а случајот го презело Вишото јавно обвинителство. Поради вклученоста на малолетното дете во случајот, ангажиран е и Центарот за социјална работа, кој треба да му обезбеди правна и психолошка поддршка.
