Го претепале до смрт сведокот за случајот со малата Данка Илиќ, уапсени осум полицајци во Србија

Осум припадници на српската полиција се уапсени под сомнение дека со тортура и нанесување тешки повреди ја предизвикале смртта на Далибор Драгијевиќ, брат на еден од осомничените за убиството на двегодишната Данка Илиќ. Апсењата се извршени по налог на Вишото јавно обвинителство во Ниш, кое го истражува случајот.

Драгијевиќ бил однесен во Полициската управа во Бор за време на истрагата за исчезнувањето на девојчето во Србија во март 2024 година. Според обвинителството, полициските службеници му нанеле тешки повреди за време на испрашувањето, од кои починал. Полицијата првично соопштила дека станува збор за природна смрт, но обдукцијата покажала дека смртта настапила како последица на насилство.

— реклама —

Меѓу уапсените се четворица припадници на Единицата за обезбедување одредени лица и објекти, кои во времето на настанот биле членови на Управата за криминалистичка полиција, како и уште четворица полициски службеници од истата управа. Тие се осомничени за злоупотреба и тортура во ноќта меѓу 6 и 7 април 2024 година, во врска со тешка телесна повреда со смртен исход.

На осомничените им е одредено задржување од 48 часа, по што треба да бидат изведени пред обвинителството на сослушување.

— реклама —

Вишото јавно обвинителство во Ниш соопшти дека во изминатиот период издавало наредби за апсење на осомничените, но дека Секторот за внатрешна контрола при српското МВР не постапил по нив.

— реклама —

Случајот со исчезнувањето на Данка Илиќ, која последен пат била видена на 26 март 2024 година, сè уште нема судска разрешница. Тогашниот министер за внатрешни работи Братислав Гашиќ соопшти дека двајца работници од комунално претпријатие во Бор се осомничени дека ја удриле со службено возило, го ставиле нејзиното тело во багажникот и го фрлиле на депонија. Нејзиното тело досега не е пронајдено.

Апсењето на осуммината полицајци е дел од низата приведувања во Србија по парламентарните избори. Во средата беа приведени девет активни и еден поранешен полицаец, осомничени за прекумерна употреба на сила врз притвореници за време на минатогодишните антивладини и антикорупциски протести во Белград.

— реклама —

Претходно беше уапсен и началникот на Управата за криминалистичка полиција, Марко Кричак, осомничен за злоупотреба на службената положба и насилство врз приведени студентски активисти. Кричак важеше за близок поддржувач на поранешниот српски претседател Александар Вучиќ.

Четири дена по изборната победа на Студентската листа, нејзините кандидати побараа побрза промена на власта, оставки од раководните лица во полицијата, разузнавачките служби и судството, како и итен попис на состојбата во јавните институции и мерки за спречување на уништување документација.