Во последните 24 часа полицијата регистрирала десет случаи на семејно насилство на подрачјето на државата, при што пет лица се лишени од слобода, со едно лице е извршен службен разговор, а за останатите случаи се преземаат мерки за расчистување.
Според информациите од Министерството за внатрешни работи, најголем број од пријавите се однесуваат на физички напади врз сопруги и поранешни партнерки, но евидентирани се и случаи на психичко вознемирување, закани и агресивно однесување во семејството.
Во Скопје бил приведен 46-годишен маж од Карпош по пријава дека физички ја нападнал сопругата. Дополнително, регистрирани се уште неколку случаи на пријавено семејно насилство, меѓу кои долготрјано физичко и психичко малтретирање од вонбрачен партнер, закани од син кон мајка и сестра, физички напад од поранешен партнер и повеќемесечно психичко вознемирување преку телефонски повици и пораки.
Во Кочани е приведен 40-годишен маж по пријава од неговата сопруга дека подолг период ја малтретирал, а последниот напад бил извршен со употреба на тврд предмет.
Во Штип полицијата лишила од слобода 56-годишен маж по пријава од неговата сопруга за физички напад во семејниот дом.
Во Делчево е приведен 30-годишен маж откако неговата сопруга пријавила дека ја нападнал во домот и на јавна површина. При проверките било утврдено дека бил под дејство на алкохол, со измерени 1,79 промили.
Во Велес, по пријава за агресивно однесување и закани кон сопругата, со едно лице бил извршен службен разговор, додека подоцна бил приведен и 43-годишен маж по пријава од неговата мајка дека физички ја нападнал. За случајот биле известени јавен обвинител и Центарот за социјални работи.
Во Крива Паланка, пак, бил приведен 29-годишен маж поради агресивно однесување и закани кон сопругата, по што бил пренесен во здравствена установа во Скопје каде е задржан на лекување.
Од МВР информираат дека по целосното документирање на сите случаи против сторителите ќе бидат поднесени соодветни пријави.
