СДСМ преку соопштение реагира дека дизел горивото повторно поскапува, третпат по ред, и покрај најавите на премиерот Христијан Мицкоски за намалување на цените.
Од партијата посочуваат дека со најновата корекција, цената на еден литар дизел достигнува речиси 100 денари и тврдат дека по секоја најава за мерки од Владата следува ново поскапување.
„Како што веќе рековме, секогаш кога Мицкоски ќе најави мерки за намалување на цените, веднаш следува ново поскапување. По неговите најави – не еднаш, туку трипати се случува поскапување на дизел горивото“, наведуваат од СДСМ.
Според партијата, граѓаните стравуваат од ваквите најави, бидејќи, како што велат, поскапувањето на дизелот влијае врз трошоците за транспорт, а со тоа и врз цените на храната и останатите производи.
Од СДСМ оценуваат дека наместо намалување на цените, секоја мерка што ја најавува Владата резултира со нови поскапувања.
