Полициските службеници во текот на изминатото деноноќие лишиле од слобода 11 возачи на повеќе локации низ државата поради безобѕирно управување со моторни возила, информира Министерството за внатрешни работи.
Според информациите, деветмина од приведените управувале возила без да поседуваат возачка дозвола, додека двајца биле затекнати како возат под дејство на алкохол.
Најмногу случаи се регистрирани во Куманово, каде биле приведени тројца возачи без возачка дозвола. По двајца вакви возачи биле лишени од слобода во Гостивар, а по еден во Скопје, Прилеп, Тетово и Неготино. Во Прилеп станува збор за малолетно лице, додека во Тетово возачот бил учесник во сообраќајна незгода.
Поради управување возило под дејство на алкохол, полициски службеници лишиле од слобода по еден возач во Македонска Каменица и во Кичево, при што кичевецот бил учесник во сообраќајна незгода.
Од МВР најавуваат дека по целосното документирање на случаите против сите сторители ќе бидат поднесени соодветни кривични пријави.
Воедно, од Министерството апелираат до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит, доколку имаат изречена забрана за управување или доколку се под дејство на алкохол, со цел зголемување на безбедноста на патиштата.
