Во Охрид започна бесплатен наставно-научен едукативен камп за средношколци од Скопје, во кој во првата смена учествуваат 115 ученици.
Градоначалникот на Скопје, Орце Ѓорѓиевски, информираше дека младите во текот на престојот ќе имаат можност да учествуваат во научно-истражувачки работилници, предавања, интерактивни дискусии и тимски проекти, но и во културни, креативни и спортски активности.
Целта на кампот е летниот период учениците да го искористат за стекнување нови знаења и вештини, развивање на критичкото размислување, како и унапредување на лидерските, комуникациските и презентациските способности.
Покрај едукативните активности, средношколците ќе имаат можност да го запознаат културното и историското наследство на Охрид, да разменуваат искуства и да создадат нови пријателства.
Втората смена, исто така со 115 ученици, ќе престојува во Охрид од 25 до 31 август.
Ѓорѓиевски порача дека вложувањето во младите и создавањето можности за нивен развој е инвестиција во иднината на целото општество.
