Средношколци и пратеници во Собранието ќе дебатираат за дезинформациите и влијанието на социјалните мрежи

Како младите ги избираат изворите на информации, кому му веруваат и дали умеат да препознаат дезинформации и манипулативни содржини на интернет ќе биде во фокусот на дебатата меѓу средношколци и пратеници, што ќе се одржи во Собранието.

— реклама —

Настанот „Што гледаш, кому веруваш? – Младите, информациите и дезинформациските кампањи“ го организира Институтот за комуникациски студии (ИКС), во соработка со Собранието, преку Парламентарниот институт и Клубот за младински прашања и политики.

Целта е да се отвори непосреден дијалог во кој средношколците ќе ги споделат своите искуства и навики во користењето на интернетот и социјалните мрежи. Ќе се разговара и за влијанието на инфлуенсерите и креаторите на содржини врз мислењето на младите, како и за препознавањето манипулативни објави и содржини создадени со вештачка интелигенција.

— реклама —

Дел од дискусијата ќе бидат и образовните програми, односно дали тие ги подготвуваат младите за современите предизвици и што е потребно за развивање критичко размислување и отпорност на дезинформации.

— реклама —

Во дебатата ќе учествуваат средношколци од седум училишта од Скопје, Прилеп, Валандово, Велес и Липково, пратеници и претставници на институциите и организациите вклучени во настанот. Предвидени се и излагања за медиумската писменост, формалното и неформалното образование, како и за навиките и довербата на младите во изворите на информации.

Поздравни обраќања ќе имаат претседателот на Собранието, Африм Гаши, и британската амбасадорка Маја Сивањанам. Дебатата ќе ја отвори пратеничката и претседателка на Клубот за младински прашања и политики, Драгана Бојковска, а ќе ја модерира Моника Аксентиевска од ИКС.

— реклама —

Настанот се организира во рамки на проектот „КОМПАС“, финансиран од Владата на Обединетото Кралство, со поддршка на Британската амбасада во Скопје.