По 14 години, Владата обезбедува нови автобуси, со кои, како што наведува Министерството за транспорт, треба да се придонесе за намалување на загадувањето, ублажување на сообраќајниот метеж и подобрување на урбаната мобилност.
Од Министерството посочуваат дека станува збор за прва голема набавка на целосно електрични еколошки автобуси спроведена од Владата, наменета за подобрување на јавниот градски превоз во Скопје и другите општини.
Според Министерството, постапката била јавна и отворена за сите понудувачи, а преку електронската аукција била постигната единечна цена од 321.958 евра без ДДВ за еден автобус.
Новите автобуси ќе имаат автоматски регулиран систем за ладење и греење, електромотор со максимална моќност од најмалку 350 kW, дисплеи за прикажување на станиците и бројот на линијата, три врати и платформа за лица со инвалидитет. Ќе располагаат и со системи за кочење и безбедност, а капацитетот ќе биде најмалку 33 седечки и вкупно 67 патници.
Министерството нагласува дека при споредбата со други автобуси треба да се земат предвид нивните технички карактеристики, должината, капацитетот, видот на погонот, безбедносните системи и квалитетот.
Во однос на критиките за капацитетот, од Министерството велат дека автобусите со кои се прават споредбите се на погон на компримиран природен гас и имаат различни технички карактеристики. Како пример ги наведуваат донираните автобуси, кои имаат 29 седечки места, односно четири помалку од новите електрични автобуси.
„Се работи за различен тип на автобуси и затоа е несоодветно да се прават вакви споредби“, наведуваат од Министерството.
Вкупната вредност на набавката изнесува 59,9 милиони евра и опфаќа 150 електрични автобуси и 75 полначи. За споредба, Министерството го наведува проектот во Загреб, каде што биле набавени 62 електрични автобуси за 56,8 милиони евра.
Од вкупно 150 автобуси, дел ќе бидат наменети за Скопје, а дел за други општини, со цел подобрување на јавниот превоз и намалување на влијанието врз животната средина.
Според Министерството, покрај еколошките придобивки, новите автобуси треба на подолг рок да придонесат и за намалување на трошоците за одржување и потрошувачка на енергија.
Набавката, како што наведуваат од Министерството за транспорт, е дел од стратешки план за трансформација на градскиот сообраќаен систем и подобрување на ефикасноста на транспортната мрежа.
