150 настани низ Италија како алтернатива на Halloween, Ватикан ја промовира светоста

Додека многумина се подготвуваат за прославата на празникот Ноќ на вештерките (Halloween), Ватикан, како одговор на овој празник, подготви низа манифестации низ Италија во рамките на иницијативата „Ноќ на светилиштата“, пренесува денеска агенцијата „Аднкронос“.

Оваа иницијатива на Канцеларијата на Италијанската бискупска конференција (CEI), задолжена за слободно време, туризам и спорт, се одржува од 2019 година во јуни, но оваа година календарот е променет и приспособен.

— реклама —

Целта на иницијативата е промоција на светилиштата како места за евангелизација, гостопримство и аџилак. Настанот ќе опфати 150 активности низ Италија, вклучувајќи молитвени бденија, како и уметнички и културни програми.

— реклама —

Во Рим, како алтернатива на световниот обичај на собирање слатки, ќе се одржи манифестацијата „Ноќ на сите светци – Ноќ на светлината“.

Во римската населба Трастевере вечерва ќе се одржи свечено богослужење, а во иницијативата учествува и градот Тренто.

— реклама —

Калуѓерките од градот Бра ќе организираат настан „Против Ноќта на вештерките“ во црквата на нивниот манастир, кој ќе опфати света литургија.

Во меѓувреме, младите од Падованската бискупија ќе се соберат на настанот „Светци во ноќта“, кој ќе вклучува музика, забава и молитва.

Слични собири ќе се одржат и во Равена и Асти, каде што преку приказни за светителите, учесниците ќе бидат повикани повторно да го откријат повикот кон светоста како можен пат кој му е достапен на секого, пренесува италијанската агенција.