Папата Лав XIV има рак на белите дробови

Папата Лав XIV (71) има рак на белите дробови, потврдено е по хируршката интервенција на која денеска беше подложен во римската болница „Џемели“. Операцијата поминала успешно, а поглаварот на Римокатоличката црква се опоравува во болницата.

Според информациите што ги објавија повеќе меѓународни медиуми, меѓу кои и „Асошиејтед прес“, кај папата е потврден аденокарцином на белите дробови, вид малиген тумор. За време на операцијата бил отстранет долниот лобус на десното белодробно крило.

— реклама —

Хируршката интервенција била изведена со минимално инвазивна техника, траела околу 90 минути и поминала без пријавени компликации.

„Операцијата заврши успешно, во предвидениот временски рок и според планот“, соопшти Ватикан, потврдувајќи дека папата е вратен во својата болничка соба.

— реклама —

Интервенцијата ја предводел професорот Стефано Маргаритора, раководител на торакалната хирургија во болницата „Џемели“.

— реклама —

Папата уште во неделата, на 11 октомври, јавно соопшти дека лекарите при неодамнешни медицински прегледи откриле мал, локализиран јазол на белите дробови. Тогаш објасни дека промената била забележана во многу рана фаза и дека ја прифатил препораката на лекарите за оперативно отстранување.

Првичните информации укажуваат на поволни изгледи за закрепнување поради раното откривање и хируршката интервенција. Сепак, дополнителните медицински анализи треба да дадат попрецизна процена за понатамошниот третман.

Се очекува Лав XIV да остане во болницата приближно една недела, а неговите јавни активности се откажани до 20 октомври.

Ова е првиот поголем здравствен проблем што јавно е обелоденет за Лав XIV откако беше избран за поглавар на Римокатоличката црква во мај 2025 година.