Папата опериран од рак на белите дробови, Ватикан со нови информации за неговата состојба

Папата Лав XIV ја откажа посетата на италијанскиот град Асизи, планирана за 27 октомври, по препорака на лекарите, додека закрепнува од операција поради рак на белите дробови. Од Ватикан соопштија дека папата се опоравува многу добро, но дека патувањето со хеликоптер би претставувало непотребен ризик во оваа фаза од закрепнувањето.

На 13 октомври, на папата хируршки му бил отстранет долниот лобус на десното белодробно крило, откако му бил дијагностициран аденокарцином, најчестиот вид рак на белите дробови.

— реклама —

Неговите лекари соопштија дека дополнителните анализи на отстранетото ткиво потврдиле дека карциномот бил локализиран и дека нема потреба од понатамошно континуирано онколошко лекување.

Хирургот и личниот лекар на папата, Луиџи Карбоне и Стефано Маргаритора, информирале дека контролниот рендгенски преглед на градниот кош покажал одличен постоперативен напредок.

— реклама —

„Со оглед на краткото време што помина од операцијата, лекарите од претпазливост советуваа да се избегне планираното патување со хеликоптер на 27 октомври“, се наведува во соопштението објавено од Ватикан.

— реклама —

Папата требаше да присуствува на мировниот собир „Невооружен и разоружувачки мир“ во Асизи, организиран по повод 40-годишнината од Светскиот ден на молитвата за мир, кој во 1986 година го иницираше папата Јован Павле II.

Иако нема лично да присуствува, Лав XIV ќе испрати порака до организаторите и учесниците. Од Ватикан нагласуваат дека тој останува посветен на меѓурелигискиот дијалог и потрагата по мир во време на меѓународни конфликти.

Папата беше отпуштен од болница во саботата и постепено се враќа на редовните обврски. Во средата повторно се појави на плоштадот „Свети Петар“, каде што учествуваше на вообичаената неделна аудиенција со верниците.

Засега не е познато дали здравствената состојба ќе му дозволи да го реализира планираното патување во Уругвај, Аргентина и Перу, предвидено од 6 до 17 ноември.