Вкупно 168 санкции биле изречени во рамки на засилена акциска контрола што ја спроведе Одделението за безбедност на патниот сообраќај при СВР Скопје на подрачјето на главниот град.
Контролата била реализирана во периодот од 16:00 часот на 18 јуни до 01:00 часот на 19 јуни, при што најголем дел од прекршоците се однесувале на возачи на мотоцикли и мопеди.
Според податоците на полицијата, изречени се 56 мерки за управување мотоцикл без заштитна кацига, шест санкции за возење со несоодветна категорија, како и 18 мерки за управување велосипед со помошен мотор без положен возачки испит.
Дополнително, санкционирани биле пет возачи на нерегистрирани мотоцикли, а изречена е и една мерка за непочитување на знак за запирање.
Полицијата евидентирала и 66 други прекршоци, меѓу кои неносење возачка или сообраќајна дозвола, неистакнати регистарски таблички, недавање првенство на минување на други возила или пешаци и други сообраќајни прекршоци.
При контролата биле констатирани и две кривични дела за безобѕирно управување со мопед согласно член 297-а од Кривичниот законик, како и едно кривично дело по член 215 од Кривичниот законик.
