Седумнаесет години по најтешката бродска несреќа во историјата на Охридското Езеро, споменот на 15-те бугарски туристи кои ги загубија животите и денес останува длабоко врежан во сеќавањата на Охрид и на нивните семејства.
На 5 септември 2009 година, околу 10:30 часот, бродот „Илинден“ со 57 патници, кој пловел на релацијата Охрид – Свети Наум, се превртел и потонал на околу 250 метри од брегот, во близина на автокампот „Елешец“. Во трагичната несреќа животот го загубиле 15 туристи од Бугарија.
Жртвите биле жители на општините Антон, Пирдоп, Златица, Мирково и Рибарица во Бугарија. Трагедијата оставила длабока трага кај нивните семејства, но и во двете земји.
Бродот бил извлечен од водите на Охридското Езеро на 19 септември 2009 година и бил одвлечен до каналот Студенчишта. Таму се наоѓа и денес, како нем сведок на трагедијата во која за само неколку минути згаснале 15 животи.
Седумнаесет години подоцна, 5 септември останува ден на сеќавање и почит кон жртвите на „Илинден“.
