Охридското Езеро порибено со 6,5 тони пастрмка, надминат годишниот план

Со пуштањето на 100.000 единки охридска пастрмка во Охридското Езеро заврши порибувањето за 2026 година, при што вкупно биле внесени 6,5 тони одгледан подмладок. Тоа е за 1,6 тони повеќе од првично планираните 4,9 тони, соопшти министерот за земјоделство Борче Серафимовски при посетата на Хидробиолошкиот институт во Охрид.

Серафимовски информираше дека е потпишан и договор со Хидробиолошкиот институт за следниот циклус на вештачки мрест и порибување во текот на наредната година, со кој се предвидува производство на нови 1.550.000 млади пастрмки.

— реклама —

Во годинашното порибување биле вклучени и 100.000 поголеми единки од минатогодишниот мрест, со просечна тежина од 16 грама. Оваа мерка има цел да го надомести пропуштеното во периодот од 2019 до 2023 година, кога имало прекин во вештачкиот мрест.

— реклама —

Министерот посочи и дека кај летната форма на охридската пастрмка, по 23 години од последниот вештачки мрест, експериментално бил добиен подмладок што успешно се одгледува.

Покрај заштитата на охридската пастрмка, Министерството за земјоделство, шумарство и водостопанство ги засилува и активностите за зачувување на јагулата, која е критично загрозен вид.

— реклама —

„Нејзиното зачувување го поставуваме како институционален приоритет. Владата за првпат усвои Национален план за управување со јагула“, нагласи Серафимовски.

Според најавите, Хидробиолошкиот институт ќе ги спроведува мерките за внесување млади јагули, како и за безбеден транспорт на сребрените јагули кон морето. За нивниот пренос се предвидени 40 отсто од утврдената годишна квота за лов на традиционалната рибарска замка „Далјан“ на Црн Дрим кај Струга.

Со ова треба да им се овозможи на јагулите безбедно да го продолжат патот кон Саргасовото Море, избегнувајќи го минувањето низ турбините на хидроцентралите.