По повод две години од формирањето на Владата, портпаролката на СДСМ, Богданка Кузеска, на денешната прес-конференција упати серија критики за работата на премиерот Христијан Мицкоски и актуелната власт, оценувајќи дека изминатиот период бил обележан со економски проблеми, задолжувања и, како што рече, политички притисоци.
Од СДСМ тврдат дека Владата не успеала да ги исполни очекувањата на граѓаните и дека наместо подобрување на животниот стандард, државата се соочува со раст на сиромаштијата, иселување на младите и недостиг од суштински реформи.
Кузеска посочи дека за две години државата се задолжила со 2,5 милијарди евра нов долг, додавајќи дека, според партијата, нема доволно средства за повисоки плати, подобар животен стандард и одржлив пензиски систем.
„Нема зголемување на минималната плата на 600 евра, нема зголемување на платите во образованието и здравството, нема реформи и нема напредок“, истакна Кузеска.
Таа ја обвини Владата и за, како што наведе, недоволна поддршка за земјоделците, зголемена корупција и застој во евроинтегративниот процес.
Од СДСМ оценија дека Владата наместо да понуди одговори за проблемите на граѓаните, се служи со лични напади и политички пресметки.
„Граѓаните заслужуваат подобро, заслужуваат резултати, а не лаги и закани“, порача Кузеска.
Од партијата нагласуваат дека ќе продолжат да бараат, како што велат, одговорност, транспарентност и конкретни решенија за подобрување на животниот стандард на граѓаните.
