23 лица уапсени во акција против дрога во 10 градови

Полициски службеници во текот на изминатото деноноќие лишиле од слобода вкупно 23 лица на подрачјата на Скопје, Тетово, Гостивар, Куманово, Крива Паланка, Радовиш, Битола, Ресен, Прилеп и Кичево, откако кај нив или при претреси во нивните домови била пронајдена различна наркотична дрога.

Во Скопје биле приведени седум лица, кај кои биле пронајдени бела прашкаста материја, бела грутчеста материја и марихуана.

— реклама —

Во Тетово, при претрес во домот на 41-годишен тетовец, извршен по судска наредба, била пронајдена и одземена марихуана, додека во Гостивар бил приведен 54-годишен гостиварец кај кого била пронајдена бела грутчеста материја.

Во Куманово, при претреси во два одвоени случаи, биле приведени две лица, а биле запленети бела прашкаста материја, црна тврда материја, таблети и марихуана. Во Крива Паланка, при претрес во дом, била пронајдена марихуана.

— реклама —

Во Радовиш биле приведени три лица. Кај едно од нив при претрес бил пронајден кокаин, а во друг случај, при контрола на возило на регионалниот пат меѓу селата Дедино и Конче, бил пронајден хашиш.

— реклама —

Во Битола биле лишени од слобода две лица кај кои биле пронајдени бела прашкаста и бела грутчеста материја, додека во Ресен, при претрес во дом, биле откриени марихуана и дигитална вага со остатоци од дрогата.

Во Прилеп, при претрес во дом на 30-годишен прилепчанец, биле пронајдени марихуана, бела прашкаста материја и дигитална вага.

— реклама —

Во Кичево, при контрола на патничко возило со струшки регистарски ознаки, биле приведени три лица, а кај едно од нив била пронајдена бела прашкаста материја.

Од МВР информираат дека по целосно документирање на сите случаи, против приведените ќе бидат поднесени соодветни пријави.