Нов рекорд е забележан при преминувањето на Ламанш, откако дури 230 мигранти со еден чамец пристигнале во Велика Британија, што е најголем број луѓе досега регистриран во едно пловило на оваа маршрута.
Чамецот пристигнал во Велика Британија во саботата, кога вкупно 258 мигранти го преминале каналот со четири чамци, објави Би-би-си. Со тоа е надминат претходниот рекорд од јули, кога со едно пловило пристигнале 165 лица.
Од британското Министерство за внатрешни работи предупредија дека зголемувањето на бројот на луѓе во малите чамци покажува колку се опасни тактиките на криминалните групи што ги организираат преминувањата.
Според привремените податоци, од почетокот на годината до 3 август во Велика Британија преку Ламанш со мали чамци пристигнале 14.561 лице. Тоа е за 43 отсто помалку во споредба со истиот период минатата година.
И покрај падот на бројот на пристигнувања, британските власти предупредуваат дека ризикот за луѓето што го преминуваат каналот останува голем. Чамците што пристигнувале во периодот од август 2025 до август 2026 година во просек превезувале по 67 лица, што е речиси двојно повеќе од просекот во 2021 година.
Пренатрупаноста дополнително ја зголемува опасноста при преминувањето. Според податоците на Обединетите нации, најмалку 84 лица загинале при обиди за преминување на Ламанш во текот на 2024 година.
Речиси сите што пристигнуваат на овој начин поднесуваат барање за азил. Во периодот од април 2025 до март 2026 година, пристигнувањата со мали чамци сочинувале 42 отсто од сите барања за азил во Велика Британија.
Најголем број од пристигнатите биле државјани на Еритреја, кои сочинувале 18 отсто од вкупниот број, а меѓу најчестите земји на потекло се и Авганистан, Иран, Судан и Сомалија.
Британската влада најави дека ќе продолжи со мерките против криминалните мрежи што ги организираат преминувањата, а со Франција е договорено зголемување на бројот на припадници на терен долж францускиот брег.
