Пожарите продолжуваат да создаваат сериозни проблеми во Србија, каде што во моментов се активни 29 пожари на отворен простор. Само во текот на август досега се регистрирани 3.926 пожари, поради што на терен се ангажирани сите расположливи сили.
Меѓу активните пожари се и оние на планината Столови, во селото Луково кај Врање и на Златибор. Во гаснењето учествуваат припадници на противпожарно-спасувачките единици, доброволни пожарникари, како и меѓународни тимови.
Началникот на Противпожарно-спасувачката единица на српското МВР, Недељко Гагиќ, изјави дека пожарот на планината Столови, на потегот Чикер, сè уште не е локализиран, но неговото ширење е забавено и покрај силниот ветер.
На терен се околу 55 лица, меѓу кои пожарникари од Краљево, Нови Пазар, Пријепоље, Ужице и Чачак, како и доброволни пожарникарски единици од Краљево и Богутовац. Засега нема опасност за објектите, а гаснењето ќе продолжи во текот на ноќта и во наредниот ден.
Во гаснењето на пожарот во селото Луково кај Врање е вклучен и рускиот авион Ил-76. Пожарот е активен од завчера попладне, а според податоците на градскиот штаб за вонредни ситуации, една куќа била зафатена од огнот.
Рускиот авион за четири дена ангажман во Србија извршил 19 летови и исфрлил 798 тони вода врз погодените подрачја, соопшти руското Министерство за вонредни ситуации.
Нов пожар вчера попладне избувнал и во местото Водице на Златибор, каде што огнот зафатил околу два хектари ниска вегетација и борова шума.
Во гаснењето на пожарот во Делиблатската Пескара учествуваат и европски пожарникарски тимови. Шефот на Делегацијата на ЕУ во Србија, Андреас фон Бекерат, изјави дека Европската Унија во рок од 24 часа по добивањето на барањето од Србија обезбедила помош и испратила европски тимови.
Тој посочи дека се очекува европската помош да продолжи не само во гаснењето на пожарите, туку и во обновувањето и пошумувањето на погодените подрачја.
