30% од контролираните субјекти со утврдени неправилности за неиздавање фискални сметки – изречени 25 мерки за привремена забрана за работа

Управа за јавни приходи соопшти дека продолжува со засилени теренски контроли за фискализација, при што во првите четири месеци од годинава неправилности биле утврдени кај 42 проценти од контролираните субјекти.

Според УЈП, од вкупно 960 спроведени контроли, кај 395 субјекти биле констатирани прекршувања на Законот за регистрирање на готовински плаќања, а кај околу 30 проценти од случаите станувало збор за неиздавање фискални сметки, издавање непрописни сметки или непоседување фискална каса.

— реклама —

Контролите биле спроведени во 434 угостителски објекти, 318 трговски објекти, 201 услужен објект и кај седум приредувачи на игри на среќа.

— реклама —

Од Управата информираат дека бројот на пријави од граѓани е зголемен за 36 проценти во однос на лани, при што во првите четири месеци биле поднесени 887 претставки преку линијата 198, контакт-центарот и апликацијата „МојДДВ“.

За утврдените неправилности биле изречени глоби за правните и одговорните лица кај сите 395 субјекти. Најчест прекршок и понатаму останува неиздавањето фискални сметки, поради што биле изречени 242 глоби.

— реклама —

Поради повторено неиздавање фискални сметки во период од две години, на 25 субјекти им била изречена мерка привремена забрана за вршење дејност, односно запечатување на објектите.

Од УЈП најавуваат уште поголемо теренско присуство и нова методологија на контроли, која вклучува и вкрстени проверки за утврдување на веродостојноста на прикажаните приходи кај даночните обврзници.

„Насочени сме кон откривање на моделите, ризиците и механизмите преку кои се создава неевидентираниот промет“, велат од Управата, додавајќи дека ќе продолжат со мерки за сузбивање на сивата економија и обезбедување еднаков третман за сите даночни обврзници.