Подобрени услови за физичко и здравствено образование и спортски тренинзи ќе имаат учениците во 30 училишта во државата, опфатени со проект за рехабилитација на училишни објекти и набавка на спортска опрема.
Меѓу училиштата опфатени со проектот е и Основното училиште „Панајот Гиновски“ во Општина Бутел. Проектот е кофинансиран од Министерството за образование и наука, Инвестициската рамка за Западен Балкан (WBIF) и Развојната банка на Советот на Европа (CEB).
Резултатите од проектот беа претставени на настанот „УЧИ, ИГРАЈ, РАСТИ“, каде што министерката за образование и наука, проф. д-р Весна Јаневска, истакна дека поддршката од европските партнери е значајна за подобрување на условите во училиштата.
Јаневска порача дека образованието е еден од темелите на развојот на општеството, а образовната инфраструктура е важен дел од тој процес. Според неа, училиштата треба да бидат места каде што учениците ќе се чувствуваат сигурно и прифатено и ќе имаат услови за учење и развој.
Министерката нагласи дека, покрај инвестициите во спортските училишни капацитети, во изминатите две години Владата реализирала или започнала реализација на уште 90 проекти за образовната инфраструктура во повеќе општини.
„Имаме уште многу работа. Не смееме да го заборавиме ниту едно училиште и ниту една локална заедница. Ќе продолжиме да делуваме чекор по чекор, со поддршка од партнерите и со јасна цел - секое дете да има квалитетни и достоинствени услови за образование“, посочи Јаневска.
На настанот се обратија и евроамбасадорот Михалис Рокас, амбасадорите на Италија, Шпанија и Франција – Паоло Палминтери, Рафаел Сориано Ортиз и Кристоф Ле Риголер, како и вицегувернерот на Развојната банка на Советот на Европа, Томас Бочек. Тие изразија задоволство од резултатите и упатија заедничка порака дека инвестициите во образованието, особено во инфраструктурата, треба да продолжат.
Присутните ги поздравија и градоначалникот на Општина Бутел, Дарко Костовски, и директорката на училиштето, Благородна Сотиров, кои се заблагодарија што со проектот е опфатено и ООУ „Панајот Гиновски“.
Проектот „Рехабилитација на објекти за физичко образование во основните и средните училишта и набавка на спортска опрема“ започна да се реализира во 2024 година. Неговата вкупна вредност до завршувањето на сите градежни работи ќе изнесува околу 3 милиони евра.
