ЈАНЕВСКА

Јаневска учествува на Светскиот образовен форум во Лондон

Од 17 до 20 мај во Лондон ќе се одржи Светскиот образовен форум, најголемиот глобален собир на министри за образование и вештини што се организира по 24 пат.Годинава, темата на форумот е „Образование за заедничка иднина: Мир, планета, цел и патеки“.Како што наведуваат организаторите на форумот - Министерството за образование на Обединетото Кралство, Канцеларијата за надворешни работи, Комонвелт и развој, Министерството за бизнис и трговија и Британскиот совет, во време на глобална неизвесност и ескалација на геополитичките тензии, зголемување на нееднаквостите, интензивирање на климатските кризи и брзи технолошки промени, образованието е клучна сила и извор на отпорност, иновации и социјална кохезија. Единствено преку вложување во знаењата, вештините и вредностите на младите, може да се изградат општества ориентирани кон мир, праведност и одржлив развој.Министерката за образование и наука проф. д-р Весна Јаневска ќе учествува на повеќе тематски сесии, а ќе биде и меѓу говорниците на панел дискусија посветена на креирање образовни политики базирани на факти, каде ќе ги претстави македонските искуства и реформски процеси во образовниот систем.На форумот се очекува присуство на над 150 министри и делегации од целиот свет, како и претставници на меѓународни организации, академската заедница и граѓанскиот сектор.

Македонија | пред 4 дена

Казна од 250 евра за родителите на децата насилници и родителите кои одбиваат соработка со училиштето и надлежните институции, најави Јаневска

Министерката за образование и наука Весна Јаневска, потврди дека со законски измени ќе се воведе глоба од 250 евра за родителите чии деца вршат насилство во училиштата, но и за оние кои одбиваат соработка со училиштето и надлежните институции.Министерката денеска изјави дека државниот секретар е во постојан контакт со пратениците и дека во Собранието веќе се дооформуваат предлозите за измените на Законот за основно образование.„Веќе е донесена одлука, тие измени ќе се направат и останува глобата од 250 евра за секое сторено насилно дело на детето да биде казнет родителот, но и тоа што е многу важно – и кога родителот ќе одбие да соработува со училиштето и другите институции“, рече Јаневска.Измените се најавуваат по серијата случаи на врсничко насилство што ја вознемирија јавноста, меѓу кои и случајот во основното училиште „25 Мај“ во скопската населба Ченто, каде 15-годишен ученик беше повреден со остар предмет.Јаневска посочи дека целта е да се создаде побезбедна училишна средина и да се зголеми одговорноста на сите инволвирани во воспитно-образовниот процес.

Македонија | пред 5 дена

Јаневска најави казни за родители на насилни деца

Весна Јаневска, министерка за образование и наука, најави законски измени со кои ќе се предвидат санкции за родители чии деца покажуваат насилно однесување во училиштата.Таа информираше дека веќе се разговара со пратеници за формулирање на измените во законската регулатива.„Во моментот разговараме со пратениците да се формулира таа измена во законот“, изјави Јаневска на прес-конференција.Изјавата следува по последниот случај на насилство во основно училиште во општина Чаир, како и по инцидентот во ООУ ООУ „25 Мај“ во населбата Ченто, каде 15-годишник нападнал ученик со остар предмет.Од МВР соопштија дека малолетникот бил лишен од слобода, а повредениот ученик бил пренесен во комплексот клиники Мајка Тереза.Директорот на Ургентниот центар, Игор Мерџаноски, информираше дека момчето е во стабилна, но и понатаму животнозагрозувачка состојба, со сериозни повреди на црниот дроб и долната шуплива вена.Јаневска оцени дека агресијата кај децата и внесувањето ладно оружје во училиштата не потекнуваат од образовните установи, туку од надворешната средина и семејството.„Целата држава што и да направи, ако не се вклучат родителите, не може да постигнеме успех“, порача министерката.Таа повторно ја отвори и темата за лиценцирање на училишните психолози, како и дополнителна едукација на наставниците за препознавање насилно однесување кај учениците.

Македонија | пред 1 седмица

Јаневска: Буџетот за наука е двојно зголемен во 2026 година

Весна Јаневска, министерка за образование и наука, изјави дека Владата и Министерство за образование и наука продолжуваат со зголемување на средствата за научно-истражувачка дејност и создавање нова регулаторна рамка за поддршка на науката.На научна конференција организирана од Институт за македонска литература при УКИМ, Јаневска истакна дека приоритет е создавање целосен систем за поддршка на науката преку современи лаборатории, фондови за иновации, програми за млади истражувачи и јасни правила.„Најдоброто што можеме да го направиме за нашите деца и за нашата иднина е постојано да ги зголемуваме средствата за научно-истражувачка дејност“, рече Јаневска.Таа информираше дека буџетот за наука во 2026 година е двојно зголемен во споредба со 2024 година и изнесува над 770 милиони денари, при што најголем дел од средствата се наменети за научно-истражувачки проекти од национален интерес.Министерката посочи и дека е изготвен нов Предлог-закон за научно-истражувачка дејност, кој заедно со законите за високо образование и обезбедување квалитет во високото образование наскоро треба да влезе во собраниска процедура.Според Јаневска, базите „Web of Science“ и „SCOPUS“ се бесплатно достапни за научниците и истражувачите од јавните високообразовни и научни установи, а земјата и натаму има пристап до меѓународни програми за наука, меѓу кои и Хоризонт Европа.Конференцијата беше организирана и по повод 45 години од основањето на Институтот за македонска литература.

Македонија | пред 1 седмица

Над 70 проценти од деветтооделенците се запишуваат во стручни училишта - „Занаетите имаат иднина, стручното образование станува сè поатрактивно" , вели Јаневска

Министерство за образование и наука информира дека во АСУЦ „Боро Петрушевски“ денеска и утре се одржува Национален натпревар на вештини, наменет за ученици од средните стручни училишта.Настанот е во организација на Занаетчиска комора Скопје со поддршка на Европска Унија, а на отворањето присуствувале министерката за образование и наука Весна Јаневска, амбасадорот на ЕУ Михалис Рокас, градоначалникот Орце Ѓорѓиевски, директорот на Центарот за развој на стручно образование и обука Бесник Зендели и претседателот на Комората Горан Ристовски.Јаневска истакна дека јакнењето на стручното образование е стратешки важно во услови на глобален недостиг на вештини и потреба од одржлив економски раст.„Со озаконувањето на дуалното образование ги регулиравме односите меѓу средните училишта и бизнис секторот. Достигнавме бројка од 800 работодавачи кои им овозможуваат на учениците да учат на вистински работни места“, рече Јаневска.Таа најави дека со новиот Закон за високото образование ќе се овозможи и високо дуално образование, со цел создавање професионалци кои ќе комбинираат практични вештини и академско знаење.Според податоците на МОН, во моментов стручно образование се реализира во 76 јавни средни училишта, а речиси 70 проценти од деветтооделенците годинава се запишале во стручни училишта.За учебната 2026/2027 година се обезбедени повеќе од 25 илјади места за упис во прва година, од кои 17 илјади во стручно образование, а речиси 7 илјади во дуални паралелки.Меѓу новите образовни профили се Техничар за мултимедиски технологии, Компјутерски техничар за развој на видеоигри и виртуелна реалност и Техничар за енергетски ефикасно греење и климатизација.„Средното стручно образование е навистина успешен модел на образование во Македонија. Занаетите имаат иднина, или како што популарно се вели – занаетите злато вредат“, додаде Јаневска.

Македонија | пред 1 седмица

Јаневска: Стручните служби и родителите заеднички да придонесат за воспитување на учениците и создавање побезбедна училишна средина, нова обврска на наставниците - дежурство во училишните простории и дворови

Министерката за образование и наука Весна Јаневска на денешната прес-конференција истакна дека не е доволно само декларативно да се зборува за младите како иднина, туку дека се потребни конкретни мерки и инвестиции.Таа посочи дека во училиштето „Гоце Делчев“ се подобруваат инфраструктурните услови со цел учениците да имаат поквалитетна настава, а наставниците подобри услови за работа.Јаневска нагласи дека инвестициите се реализираат со поддршка од Владата и Министерството, при што се продолжува со исполнување на ветените проекти за образовниот систем.Таа им се заблагодари на локалната самоуправа и училиштниот кадар за ангажманот, истакнувајќи дека дел од проектите придонесуваат и за заштита на животната средина и намалување на емисиите.Министерката се осврна и на прашањето за безбедноста во училиштата, најавувајќи нови мерки и упатства, меѓу кои и обврска за дежурства на наставниците во училишните простории и дворови.Според неа, целта е наставниците, стручните служби и родителите заеднички да придонесат за воспитување на учениците и создавање побезбедна училишна средина.Јаневска апелираше до родителите за поголема соработка со наставниците и прифаќање на нивните препораки, нагласувајќи дека тоа е важно за правилен развој на децата и подобрување на образовниот процес.

Македонија | пред 2 седмици

Јаневска: Поништени дипломи на УКИМ и на Славјанскиот универзитет

Министерката за образование и наука, Весна Јаневска, информираше за сериозни неправилности во високото образование, поради кои се поништени студентски документи и се поднесени пријави до Јавното обвинителство.Како што соопшти Министерството, на Филозофскиот факултет при УКИМ се утврдени неправилности поврзани со 17 студенти. Во рамките на постапката се поништени осум дипломи, а дел од случаите се однесуваат на студенти кои веќе ги продолжиле студиите на повисоки циклуси.Дополнително, останува една постапка што треба да ја заврши самиот факултет, по што Министерството ќе ги поништи документите за сите засегнати студенти.Во друг случај, на приватен универзитет, е утврдено дека еден студент поседувал две дипломи за истовремени студии на различни циклуси, при што постои сомнеж дека документите се фалсификувани.Министерката Јаневска истакна дека Министерството постапува неселективно и дека законот важи подеднакво за сите високообразовни институции, без разлика дали се јавни или приватни.Случаите се веќе пријавени во Јавното обвинителство, кое треба да ја продолжи постапката и да утврди евентуална кривична одговорност.

Македонија | пред 2 седмици

Нови безбедносни мерки: Наместо ученици, наставници ќе дежураат во ходници и дворови, најави Јаневска

Министерството за образование и наука (МОН) најави засилени безбедносни мерки и поголем надзор во училиштата како одговор на неодамнешниот случај на врсничко насилство во Ѓорче Петров.Министерката за образование, Весна Јаневска информираше дека веќе се испратени дописи до сите градоначалници и училишта. Наместо ученици, во ходниците и дворовите сега ќе мора да дежураат наставници.Целта на оваа мерка е наставниот кадар навремено да спречува евентуални инциденти меѓу учениците.„Тоа што се случило надвор од училиштето не е оправдување. Тоа се ученици на одредено училиште и наставниците мора да имаат увид во тоа како се однесуваат нивните ученици, затоа што тоа е воспитно-образовен процес“, изјави  Јаневска.Дополнително, дежурните наставници ќе мора да бидат на видно место, со цел Државниот просветен инспекторат да може полесно да врши контроли и да го констатира нивното присуство.

Македонија | пред 2 седмици

Јаневска: Заедно со партнерите продолжуваме да го унапредуваме стручното образование и да го поврзуваме со бизнис заедницата

Министерката за образование и наука Весна Јаневска изјави дека институциите, во соработка со партнерите, продолжуваат со унапредување на стручното образование и негово поврзување со бизнис секторот, на настан во Стопанската комора на Македонија каде беа доделени грантови од Регионалниот фонд за предизвици, како што наведуваат од Министерството во соопштение.На настанот беше доделен грант од околу 500 илјади евра за проектот „Паметна обука во преработката на производи од млеко и месо“, кој ќе го реализираат Земјоделскиот факултет при Универзитетот „Гоце Делчев“ во Штип и средното училиште „Кочо Рацин“ од Свети Николе, во соработка со шест компании. Со овие средства ќе се изгради и опреми современ центар за обука, ќе се подготват наставни програми и ќе се поддржат квалификации за млекопреработувачи и преработувачи на месо, стои во соопштението.Јаневска нагласи дека дуалното образование во земјава покажува значајни резултати, со активно учество на училиштата, факултетите и компаниите, како и со практична обука за учениците под менторство. Таа посочи дека целта е да се одговори на предизвиците на пазарот на труд, како што се недостигот на вештини и младинската невработеност, и да се зголеми конкурентноста на домашните компании, стои во соопштението.Од Министерството во соопштението посочуваат дека според министерката, реформите во образованието се интензивираат, а обврската до крајот на 2026 година да се вклучат 700 компании во дуалното образование веќе е надмината, со повеќе од 800 активни компании. Таа најави дека бројот ќе продолжи да расте, бидејќи компаниите ги препознаваат придобивките од директно вклучување во образовниот процес.Јаневска истакна дека интересот кај учениците исто така се зголемува, при што 66 проценти од средношколците се запишани во стручно образование, а околу 30 проценти од нив следат дуален модел, стои во соопштението.Дополнително во соопштението е најавено дека со новиот закон за високото образование, дуалниот пристап ќе се прошири и на универзитетите, овозможувајќи практичната настава да се реализира во соработка со компании и под менторство од стручни лица.Регионалниот фонд за предизвици, кој ги финансира овие проекти, има за цел да ја зголеми конкурентноста на претпријатијата во регионот преку инвестиции во образование и инфраструктура. Досега, преку фондот се поддржани 17 проекти во земјава со вкупна вредност од над 7,6 милиони евра, стои во соопштението.

Македонија | пред 3 седмици

Јаневска најави нов скандал: „Следува уште покрупна неправилност што ќе ја шокира јавноста“

Министерката за образование и наука, Весна Јаневска, најави дека многу скоро јавноста ќе биде запознаена со уште една, како што рече, „многу покрупна неправилност“, која ќе ја изненади целата македонска јавност, по скандалот со незаконските уписи на Филозофскиот факултет при УКИМ.Јаневска посочи дека неправилности има во одредени институции, но не во сите, и дека за нив ќе се постапува согласно закон, додека одговорноста – дали е кај администрацијата, раководството или евентуално и кај студенти – ќе ја утврдат надлежните органи.Скандалот на Филозофскиот факултет се однесува на периодот од 2019 година, кога биле запишувани студенти на едногодишни магистерски и докторски студии, иако претходно завршиле тригодишни стручни, а не академски студии. Станува збор за седум лица на магистерски и четворица на докторски студии, чии уписи, по одлука на Државниот просветен инспекторат, се поништени и им е прекинато студирањето.Досега никој од запишаните не докторирал, додека осуммина магистрирале, за кои сè уште нема одлука дали нивните дипломи ќе бидат признати.Министерката информираше дека извештајот на ДПИ го добила доцна синоќа и дека во текот на викендот ќе биде анализиран, по што во понеделник ќе следуваат конкретни одлуки.„Министерството и Инспекторатот немаат избор – мора да постапуваат по закон. Го разбирам револтот на студентите, но постојат други институции каде тие ќе ги бараат своите права“, изјави Јаневска.Таа додаде дека при уписите требало да се провери дали студентите ги исполнуваат условите, нагласувајќи дека законот за втор и трет циклус студии бил прекршен.Во меѓувреме, ректорката на УКИМ, Биљана Ангелова, изјави дека станува збор за состојба затекната од претходното раководство, од периодот 2019–2022 година, и дека Универзитетот ќе излезе со официјален став по завршување на целокупната постапка.„Мора да се почека конечниот извештај и да се постапи согласно него. Потоа ќе информираме за исходот“, рече Ангелова.Таа не ја исклучи можноста за решавање на дел од случаите преку нови акредитации или презапишување на студентите, но нагласи дека законската рамка мора строго да се почитува.Во меѓувреме, УКИМ влегува и во изборен процес за нов ректор, каде Ангелова ќе се кандидира за втор мандат, а нејзин противкандидат е професорот Дарко Данев. Изборите се закажани за 28 април.

Македонија | пред 3 седмици

Во Штип ќе се гради универзитетски фузиран центар за сајбер безбедност

Во Штип, на Универзитетот „Гоце Делчев“, ќе се гради универзитетски фузиран центар за сајбер безбедност, чиј почеток на активностите денеска беше најавен од страна на министерката за образование и наука Весна Јаневска и министерот за дигитална трансформација Стефан Андоновски, во присуство на в.д. шефицата на мисијата на Амбасадата на САД Никол Варнс, ректорот проф. д-р Дејан Мираковски и координаторот на проектот проф. д-р Методи Хаџи Јанев, стои во соопштението од МОН.Според министерката Јаневска, во услови на зголемена дигитализација, вложувањето во сајбер безбедност и дигитална отпорност претставува стратешки приоритет. Таа нагласи дека проектот е дел од визијата за создавање поотпорни институции и кадри способни да одговорат на современите сајбер закани, стои во соопштението.Таа посочи дека Македонија се позиционира како земја во регионот со капацитет за имплементација на ваков проект, а идниот центар во Штип, како што истакна, ќе биде поврзан и со Албанија и Црна Гора, со што ќе прерасне во регионален хаб за знаење, образование и истражување во областа на сајбер безбедноста, како што е наведено во соопштението.Од Министерството за образование и наука во соопштението информираат дека се работи на систематско развивање на дигитални вештини уште од најраните образовни нивоа, при што сајбер безбедноста се воведува како клучна компетенција во основното и средното образование.Како дел од активностите, со поддршка од меѓународни партнери се спроведуваат програми за зајакнување на капацитетите, меѓу кои водич за препознавање на сајбер-насилство, клубови за сајбер безбедност во средните училишта и обуки за наставници и советници, стои во соопштението.Министерката Јаневска информираше и дека повеќе од 100 училишта се опремени со безбеден безжичен интернет кој овозможува заштита од сајбер напади и ограничен пристап до небезбедни содржини, како што е наведено во соопштението од МОН.Проектот е поддржан од Бирото за Европа и Евроазија при американскиот Стејт департмент, а неговата реализација ја спроведува CRDF Global, во рамки на програмата за сајбер безбедност и дигитална отпорност на земјите од Западен Балкан, стои во соопштението.

Македонија | пред 3 седмици

Јаневска: Силна поддршка од Словенија за зајакнување на образованието на медицинските сестри и акушерките по европски стандарди

Партнерството со Словенија преку проектот „Зајакнување на образованието и професионалната регулатива за медицински сестри и акушерки во Македонија“ продолжува и во периодот 2026–2028 година, се наведува во соопштение од Министерството за образование и наука.Во соопштението, министерката Весна Јаневска истакнува дека Словенија дава силна поддршка за интеграцијата на Македонија во Европската Унија, преку конкретна соработка во образованието и здравството и пренесување на добри практики.Како што се наведува во соопштението, во изминатиот период биле поставени основи за реформи во образовните програми за сестринство и акушерство, со цел унапредување на здравствениот кадар и усогласување со европските стандарди.Во соопштението се пренесува дека е изготвена модернизирана и унифицирана додипломска програма за медицински сестри и акушерки, како и дека се работи на можностите за развој на магистерски студии во оваа област.Според министерката, новите законски решенија ќе овозможат подобрување на кариерните патеки, повисоки плати и задржување на кадарот во државата, стои во соопштението.Во соопштението се наведува и дека проектот го спроведува Центарот за европска перспектива со учество на повеќе меѓународни организации и стручни институции.

Македонија | пред 3 седмици

Јаневска: Надлежните институции ќе одлучат за случајот со Филозофскиот факултет

Министерката за образование и наука Весна Јаневска изрази надеж дека случајот со упис на магистерски и докторски студии на Филолошкиот факултет без исполнети услови е изолиран и дека не станува збор за системски проблем, изјави таа при увид во градежни активности во Основното училиште „Крум Тошев“ во село Трубарево.Таа посочи дека ситуацијата е комплексна и дека Министерството не е надлежно да одлучува за евентуална одговорност на кадарот, туку тоа е во надлежност на други институции, кои треба да ја утврдат фактичката состојба и да постапат согласно закон.Јаневска нагласи дека постапките се во тек и дека се очекуваат официјални извештаи, по што ќе се донесе конечно решение за случајот, стои во нејзината изјава.Во однос на прашањето за дипломите, таа посочи дека доколку се поништи уписот, ќе следи и поништување на дипломите, но додаде дека конечните одлуки ќе зависат од надлежните институции и од извештаите што се очекуваат.Раководството на Филозофскиот факултет при УКИМ претходно соопшти дека на седум студенти на магистерски и четворица на докторски студии им се поништува уписот и статусот на студенти, по утврдени неправилности од Државниот просветен инспекторат, кој наложил прекин на студирањето.Според деканот, проф. д-р Оливер Бакрески, проблемот произлегува од тоа што студенти со тригодишни стручни студии биле запишувани на повисоки циклуси спротивно на законските одредби, кои предвидуваат тоа да е возможно само со академски студии.Како што беше наведено, прв ваков упис бил извршен во 2019 година, а досега осум лица магистрирале, додека ниту еден студент не докторирал во вакви услови. Од Инспекторатот сè уште не е донесена конечна одлука за важноста на дипломите.

Македонија | пред 4 седмици

МОН: Се проширува капацитетот на ОУ „Крум Тошев“ во Гази Баба

Министерството за образование и наука соопшти дека се проширува капацитетот на основното училиште „Крум Тошев“ во општина Гази Баба, во рамки на инвестиции насочени кон подобрување на образовната инфраструктура во земјата, се наведува во соопштението од Министерството за образование и наука.Министерката за образование и наука Весна Јаневска, заедно со градоначалникот на општината Бобан Стефковски, извршила увид во градежните активности во училиштето во селото Трубарево. Проектот, вреден 23 милиони денари, е финансиран од Владата,стои во соопштението од Министерството за образование и наука.Како што е наведено во соопштението од Министерството со проширувањето се предвидува доградба на три училници и санитарни јазли, како и зголемување на просторот на наставничката канцеларија и училишната менза. Според надлежните, инвестицијата треба да биде завршена на почетокот на следната година и е дел од поширока програма со која се финансираат над 80 инфраструктурни проекти во училиштата,Јаневска истакнала дека вложувањата се реализираат рамномерно на територијата на државата, без разлика на урбани или рурални средини, со цел да се обезбедат еднакви услови за сите ученици. Таа, исто така, потсети дека уписите на првачиња започнуваат во мај и апелираше за почитување на реонизацијата при запишување во основните училишта, како што се наведува во соопштението од Министерството за образование и наука.

Скопје | пред 4 седмици

По повод 21 Април – Светскиот ден на креативноста и иновациите, во Скопје се одржува креативен настан за ученици „Од предизвик до иновација“

По повод 21 Април – Светскиот ден на креативноста и иновациите, во Скопје се одржува креативен и едукативен настан за ученици од основните училишта, на кој тие предлагаат решенија за таканаречени „зелени предизвици“, информираат од Министерството за образование и наука во соопштение.Настанот „Зеленикс – од предизвик до иновација“ е организиран од Агенцијата за иновации, научно-технолошки развој и претприемништво – ИНОВА, а на него присуствувале и се обратиле директорката Даниела Димовска и министерката за образование и наука Весна Јаневска, се наведува во соопштението.Министерката Јаневска истакнала дека преку вакви иницијативи институциите ги поттикнуваат младите да се вклучат во решавање на глобалните предизвици и да создаваат одржливи решенија што го подобруваат животот, без да ѝ наштетат на животната средина, стои во соопштението.Таа нагласила дека креативноста, љубопитноста и иновативноста се клучни одлики на младите, а улогата на институциите и наставниците е да ги насочат и поддржат во нивниот развој, како што се посочува во соопштението.Во рамки на образовните политики, како што изјавила Јаневска, се прават напори за поттикнување на критичкото размислување и иновациите преку модерни наставни програми, опремување на училиштата и зголемени инвестиции во науката, се наведува во соопштението.Дополнително во соопштението, се истакнува дека на учениците им се отвораат можности за учество во меѓународни програми како „Хоризонт Европа“, „Еразмус+“ и „ЦЕЕПУС“, што придонесува за нивен развој и вклучување во глобални образовни процеси.Министерката ги повикала младите да бидат посветени и креативни, нагласувајќи дека секој успех започнува со мал чекор и дека токму ваквите настани се можност за нивен напредок, се вели во соопштението.Светскиот ден на креативноста и иновациите е прогласен од Обединетите Нации и за првпат е одбележан во 2018 година.

Македонија | пред 4 седмици

Јаневска: Со поголема академска соработка, малите држави од Западен Балкан можат да го отклучат големиот регионален потенцијал

Регионалната конференција „Мостови кон иднината: Интернационализација на високото образование на Западен Балкан и Југоисточна Европа“ имаше јасна цел: да ја постави академската соработка како стратешки приоритет за регионот и да ги позиционира шесте држави повисоко во европските и глобалните мрежи на високото образование, зголемувајќи ја нивната видливост и влијание. Тоа е важно затоа што се соочуваме со реални демографски предизвици кои бараат нови модели за привлекување и задржување студенти и кадри. Недостатокот на вештини и иселувањето на талентите не можат да се решаваат изолирано, туку преку мобилност, циркулација на идеи и, пред сè, преку заеднички решенија.Ова го нагласи министерката за образование и наука Весна Јаневска на затворањето на конференцијата, на која во изминатите два дена беа презентирани бројни идеи, искуства и насоки за унапредување на интернационализацијата и засилување на регионалната соработка во делот на високото образование.Беше потенцирана важноста на инвестирањето во знаење, иновации и врски со индустријата, како и усогласување на студиските програми со потребите на пазарот на труд, како основа за создавање конкурентен и иновативен систем на високо образование.„Ние сме мали држави во регион со огромен потенцијал. Зголемените вложувања во високото образование, засновани на регионална соработка и размена на искуства во рамки на европските мрежи и иницијативи, но и пошироко, ќе ни помогнат да споделуваме ресурси, да креираме заеднички проекти и да изградиме хабови за иновации кои ќе го забрзаат економскиот и општествениот развој на сите нас“, рече Јаневска.Во следниот период претстои сумирање на сугестиите и предлозите, како и нивно преточување во приоритети и конкретни мерки кои ќе го придвижатрегионот кон поголема мобилност, соработка и иновации.

Македонија | пред 1 месец

Николова до Јаневска: Системот за унапредување на наставниците е административен лавиринт за партиски подобните

Пратеничката од СДСМ, Даниела Николова, на денешната седница за пратенички прашања го постави прашањето до министерката за образование и наука, Весна Јаневска, за процесот на стекнување на звањата наставник ментор и наставник советник во основното и средното образование, оценувајќи го како административен лавиринт дизајниран за партиски награди или елиминација и системско понижување на македонскиот наставник.Николова во своето излагање објасни дека Министерството за образование на 30 јуни 2025 година донело правилник за следење и вреднување на работата на наставниците, врз основа на кој во летото 2025 година беше објавен јавен повик за аплицирање. Наставниците почнале да ги подготвуваат своите досиеја и сертификати, но на 26 декември 2025 година правилникот бил изменет, со што рокот за комисиите бил дуплиран од 30 на 60 дена, а наставниците можеле да бидат оценувани и во други училишта.Пратеничката критикуваше што во комисиите се вклучуваат и претставници на локалните самоуправи и синдикати, кои, според неа, не можат професионално да ги оценуваат наставниците, а дел од синдикалните претставници дури се откажале поради притисоци. Николова истакна и примери на апсурди, како што се неприфаќањето на сертификати од обуки и меѓународни натпревари што наставниците ги добиле, и дискриминаторско оценување на наставниците, со тоа што дел од нив можеле да ги видат бодовите на сајтот, а други не.Таа го праша министерката дали ќе изврши ревизија на целиот процес на оценување, за сите наставници да имаат еднакви права и навистина да биде ценет нивниот труд.Ова прашање ја отвори дебатата за транспарентноста и професионалноста во системот за напредување на наставниците во земјата.

Македонија | пред 1 месец

Студентските домови „Кузман Јосифовски-Питу“ и „Стив Наумов“ готови до 1 октомври – Јаневска најави реновирање на сите останати од септември

На новинарско прашање кога очекува да заврши реновирњето на студентските домови, министерката Весна Јаневска изјави дека домовите „Кузман Јосифовски-Питу“ и „Стив Наумов“ треба да бидат подготвени за прием на студенти од 1 октомври.„Очекувам двата студентски дома да бидат подготвени и студентите да можат да влезат во „Кузман Јосифовски-Питу“ и „Стив Наумов“ веќе од 1 октомври. Очекувам и до септември да ги почнеме сите други студентски домови во Македонија и во исто време да ги реконструираме и реновираме“, изјави Јаневска.

Македонија | пред 1 месец

Јаневска: Не зависи од мене тоа дали ќе ме сменат, секојдневно работам колку што е можно повеќе

Министерката за образование Весна Јаневска изјави дека нејзиниот ангажман во Владата зависи од одлуката на премиерот Христијан Мицкоски, нагласувајќи дека таа секојдневно работи посветено на развојот на државата.„Она во што сум сигурна е дека секојдневно работам колку што е можно повеќе, за да придонесам за развој на оваа држава. Многу пати сум кажала, премиерот ја предлага владата. Партијата дополнително има свои структури кои внимателно размислуваат во корист на државата и предлагаат одредени функции.Така да не зависи само од мене или воопшто од мене, дали ќе ме менуваат или не“, изјави Јаневска.

Македонија | пред 1 месец

Јаневска: Најголема пречка е ризикот од заминување на најталентираните студенти и истражувачи

Денес и утре во Скопје се одржува регионална конференција „Мостови кон иднината: Интернационализација на високото образование на Западен Балкан и Југоисточна Европа“, чиј покровител е Министерството за образование и наука на Македонија, а коорганизатори се Регионалниот совет за соработка (RCC) и Светска банка. Дијалогот обединува министри, раководства на универзитети, академици, истражувачи, креатори на политики, претставници на индустријата, работодавачи, експерти и студенти.Нагласувајќи го значењето на конференцијата, министерката за образование и наука проф. д-р Весна Јаневска посочи дека во услови на крупни геополитички промени, расте свеста за образованието како најсигурната инвестиција, од која зависи иднината на економиите, нивната одржливост и отпорност.„Без силен придонес од високообразовната заедница преку истражувања, учење и настава, општествено влијание, иновации и трансфер на технологии, не можат да се решат главните предизвици на современите општества, вклучително и оние кои се однесуваат на целите на Обединетите нации за одржлив развој, опстанокот на нашата планета, прашањата за војната и мирот, демократијата и заедничкиот живот“, рече Јаневска, додавајќи дека клучна е интернационализацијата на високото образование.Болоњскиот процес ги отвори универзитетите за меѓународна соработка, а мобилноста носи нови знаења, искуства и иновации преку заеднички проекти и партнерства, како и пристап до технологии и финансирање. Интернационализацијата денес е неопходен механизам што им овозможува на студентите да стекнат дигитални и зелени вештини, ја придвижува државата кон иновации и отвора нови работни места, а регионот го прави поконкурентен на европскиот и глобалниот пазар.Говорејќи за предизвиците, министерката Јаневска ги наведе ограничените средства за мобилност, бирократски процедури, институционалниот капацитет, како и усогласеноста со европските стандарди.„Како држава, во последнава година и половина, направивме крупен исчекор. Ги зголемивме вложувањата во високото образование и науката, а цврсто сме решени буџетските средства за оваа намена и во следните години да растат“, рече Jаневска.„Одливот на мозоци“ сѐ уште предизвикува стравувања.„Најголема бариера останува можноста мобилноста да ни одземе од, и онака осиромашениот, академски и научен корпус и дека највредните студенти, најплодните професори и најпосветените истражувачи ќе заминат и нема да се вратат. Нашата умешност треба да ја покажеме во обезбедувањето механизми за претворање на ‘одливот на мозоци’ во ‘циркулација на мозоци’“, рече министерката.Интернационализацијата на високото образование мора да остане достапна за сите, насочена кон квалитет и размена на знаење, а не водена од финансиски интереси. Таа е средство за подобрување на високото образование и за инклузивна меѓународна соработка во регионот на Западен Балкан, што овозможува циркулација на таленти, гради конкурентност и ја зголемува иновативноста.

Македонија | пред 1 месец

Новинарот Адеми ги отфрла критиките: „Не користев агресивен тон“

Новинарот Невриј Адеми, кој предизвика бурни реакции во јавноста откако на министерката за образование Весна Јаневска ѝ се обрати со зборовите „ти кажавме да си земеш преведувач“, реагираше на изјавата на Советот на честа, изразувајќи незадоволство од начинот на кој бил третиран случајот.„Со сета почит кон вашата улога и ангажман во заштита на етичките стандарди во новинарството, сакам да го изразам моето сериозно незадоволство во врска со вашата последна изјава која се однесува на моето однесување за време на прес-конференцијата на министерката за образование и наука“, наведува Адеми.Тој смета дека не му била дадена можност да го изнесе својот став пред да биде донесен јавен заклучок.„Пред сè, сметам дека во овој случај не е земен предвид мојот став, ниту пак ми беше дадена можност да го дадам своето објаснување пред да се донесе ваков јавен заклучок. Ова, според мене, претставува отстапување од принципите на објективност и фер третман, кои треба да важат токму за органите што се грижат за етиката во медиумите“, посочува тој.Адеми ги отфрла обвинувањата дека неговото обраќање било несоодветно или агресивно.„Исто така, категорично ги отфрлам тврдењата дека мојата комуникација била несоодветна или дека сум користел агресивен тон. Моите прашања беа поставени во рамките на новинарската професија, со цел да се добијат одговори од јавен интерес, без никаква намера да се навреди или наруши достоинството на присутните“, вели Адеми.Тој додава дека Здружението на новинари на Македонија е запознаено со неговото познавање на македонскиот јазик, што, како што наведува, може да влијае на изразувањето, но не и на професионалниот пристап.„Сакам да нагласам дека Здружението на новинари на Македонија е добро информирано за моето познавање на македонскиот јазик, што во одредени случаи може да влијае на начинот на изразување, но не и на намерата или професионалниот пристап“, додава тој.Во реакцијата, Адеми истакнува дека останува отворен за дијалог.„Останувам отворен за конструктивен дијалог и подготвен сум да го појаснам мојот став во секој формат што ќе го сметате за соодветен, со цел случајот да се разгледа целосно и објективно“, наведува Адеми.Реакцијата доаѓа по низа осуди од новинарската фела и институции, кои го оценија неговото обраќање како непрофесионално и недолично, со што случајот дополнително ја отвори дебатата за етичките стандарди во новинарството.

Коментари | пред 1 месец

ЗНМ реагира за комуникацијата со Јаневска со „ти рековме”: Прекршени се етичките стандарди во случајот со новинарот во Тетово

Советот на честа при Здружението на новинари на Македонија реагираше за случајот со новинарот Невриј Адеми, оценувајќи дека начинот на комуникација на прес-конференцијата со министерката за образование и наука Весна Јаневска не соодветствува со професионалните стандарди.„Правото на слободно поставување прашања и критичко известување на новинарите е неотуѓиво и суштинско за функционирањето на едно демократско општество, но ова право подразбира и обврска за доследно почитување на професионалните и етичките стандарди, што не беше случај со последниот настан поврзан со однесувањето на новинарот Невриј Адеми на прес конференцијата на министерката за образование и наука Весна Јаневска во Тетово, случај што Советот на честа при ЗНМ внимателно го следеше и кој истиот отвори јавна дебата во медиумскиот простор“, се наведува во реакцијата.Од Советот потсетуваат дека улогата на новинарите како носители на јавниот интерес подразбира одговорност и почитување на етичките норми.„Имајќи ја предвид улогата на новинарите како носители на јавниот интерес и чувари на демократските вредности, Советот потсетува дека ова право подразбира и обврска за доследно почитување на професионалните и етичките стандарди“, посочуваат од таму.Според нив, конкретниот настап не бил во согласност со Кодексот на новинарите.„Во конкретниот случај, Советот цени дека начинот на комуникација и тонот на обраќање на новинарот не соодветствуваат со принципите на достоинствен и професионален јавен дискурс. Конкретно, членот 15 од Кодексот на новинарите, вели дека новинарот мора да ја негува културата на говорот и етиката, а непримерната комуникација со јавноста е неспојлива со новинарската професија“, стои во соопштението.Советот нагласува дека ваквите случаи ја нарушуваат довербата во медиумите и јавниот дијалог.„Советот на честа нагласува дека ваквите случаи не придонесуваат за унапредување на довербата во медиумите, ниту за квалитетен јавен дијалог. Оттука, упатуваме апел до сите новинари и медиумски работници да се придржуваат кон највисоките професионални стандарди, да ја негуваат културата на комуникација и да придонесуваат кон градење на взаемна почит во јавниот простор“, додаваат.Воедно, се посочува дека почитта мора да биде двонасочна, а институциите имаат обврска да обезбедат услови за работа на новинарите.„Воедно, Советот потсетува дека почитта во односите меѓу носителите на јавни функции и медиумите треба да биде двонасочна, при што институциите имаат обврска да обезбедат услови за непречена и професионална работа на новинарите. Во таа насока, советот укажува и дека овој случај не смее да се користи за дневнополитички цели, ниту за создавање дополнителни тензии и погрешни интерпретации во етнички контекст“, се наведува.Советот најавува дека ќе продолжи да ги следи ваквите случаи и да реагира во насока на заштита на етичките стандарди.„Советот на честа ќе продолжи да ги следи ваквите случаи и, согласно своите надлежности, да реагира во насока на заштита и унапредување на етичките стандарди во новинарството“, стои во реакцијата.

Македонија | пред 1 месец

Владата со остра реакција за односот на новинар кој министерката Јаневска: Слободата не е изговор за некултура

Во насока на зачувување на достоинството на јавниот дискурс, унапредување на демократските вредности и заштита на интегритетот на институционалната комуникација, Владата чувствува обврска јавно да реагира на неодамнешниот настан кој отвори сериозни дилеми за почитувањето на основните принципи на професионално и етичко однесување во медиумскиот простор.„Заштитата и унапредувањето на слободата на медиумите и правото на новинарите да поставуваат прашања од јавен интерес, без никакви ограничувања или притисоци се наша обврска, но истовремено, нагласуваме дека ова право подразбира и обврска за професионално, достоинствено и етичко однесување. Слободата на изразување не смее да биде изговор за нарушување на личниот и институционалниот интегритет.Во таа насока, изразуваме сериозна загриженост и остра реакција на неодамнешниот настан на јавен медиумски настан, при кој новинарот Невриј Адеми, со очигледно несоодветен тон, непримерна реторика и недолично формулирано прашање се обрати кон Министерката за образование и наука, Весна Јаневска. Особено не загрижува фактот што ваквиот непримерен однос не претставува изолиран инцидент, туку повторување на веќе забележано однесување кон истата носителка на јавна функција. Ова отвора сериозни прашања за почитувањето на основните професионални стандарди, етички норми и принципи на комуникација во јавниот простор.Воедно, Владата јасно им укажува на сите носители на јавни функции, дека од нив се очекува највисоко ниво на почит и коректност кон медиумите и новинарите. Но, исто така, со еднаква сериозност очекуваме и новинарите да возвратат со ист степен на професионализам, почит и одговорност. Почитта е, и мора да остане, двонасочна вредност во секое демократско општество.Оттука, апелираме до Советот за етика во медиумите, Здружението на новинарите и Самостојниот синдикатот на новинари и медиумски работници, како релевантни организации, јавно и недвосмислено да го осудат ваквиот чин на однесување. Очекуваме нивна активна улога во зајакнување на професионалните стандарди, како и упатување на јасен повик до сите медиумски работници за доследно почитување на етичките принципи, достоинството на личноста и културата на јавен дијалог. Ваквите ситуации, кога јавната комуникација се одвива надвор од рамките на пристојноста и меѓусебната почит не смеат да останат без соодветна институционална реакција, имајќи ја предвид нивната поширока импликација врз квалитетот на јавниот дијалог и довербата во институциите.Како Влада изразуваме и искрена благодарност до сите новинари и медиуми кои со своите јавни реакции веќе јасно, принципиелно и недвосмислено го осудија ваквиот чин, демонстрирајќи високо ниво на професионална зрелост и посветеност кон етичките стандарди. Само преку заемна почит, одговорност и придржување кон високите професионални стандарди може да се гради здрав, демократски и кредибилен медиумски амбиент, кој ќе биде во служба на јавниот интерес“, велат од Владата.

Македонија | пред 1 месец

„Ако некој одлучил да прави естрада и циркузант од себе дозволете му“, рече Мицкоски за инцидентот со новинарот и Јаневска

При денешната прес-конференција новинарите го прашаа премиерот Христијан Мицкоски за неговиот коментар во врска со вчерашната изјава на новинар кој по втор пат и порача на министерката за образование Весна Јаневска, кога доаѓа во Тетово да земе преведувач. Мицкоски одговори дека понекогаш е подобро да се премолчи, бидејќи некои луѓе и не заслужуваат да бидат коментирани.„Понекогаш тоаш то нема коментар не значи дека некој нешто заборавил да коментира, туку едноставно некои луѓе и не заслужуваат да бидат коментирани затоа што ако некој одлучил да прави естрада и циркузант од себе дозволете му, сите можат да го видат и да го слушнат. Така да подобро да премолчите отколку да влезете во таа естрада“, изјави Мицкоски.

Македонија | пред 1 месец

„Ти кажавме да си земеш преведувач“ кон министерката Јаневска - однесување што ја „тресе“ фелата

Новинар од Тетово предизвика лавина реакции во јавноста и во новинарската фела, откако на министерката за образование ѝ се обрати без персирање, користејќи „ти“, и ѝ постави прашање со зборовите: „Си зема преведувач министерке?“. Откако таа одговори „Не“, новинарот возврати: „ти кажавме кога ќе дојдеш во Тетово да си земеш преведувач“.По овој настап, следуваа низа остри реакции од новинари и јавни личности, кои го осудија однесувањето.„Коректно е медиумски организации, како што оправдано реагираат на однесување на институции и поединци кон новинарите, еднаш да излезат и осудат однесување на новинари. На страна и да им дадат совети и обуки, ако не им ги дале во редакција или на факултет. На што личи обраќање на ТИ кон повозрасно лице или лице на функција? Тоа што не се согласувате со нечија политика може да го манифестирате дома, во приватен живот и зад гласачки параван. Никако во медиумскиот простор. Тоа што некој земал микрофон, а се однесува без основна култура и со некаква политичка агенда, не значи дека е новинар, туку значи дека е активист. „Ти рековме да си земеш преведувач“ - кои сте тоа Вие што сте рекле и како случајно минатиот пат во исто време спуштивте микрофони? Замислете обратна сцена - да тргнат новинарки и новинари Македонци да делат лекции на ТИ на политичари македонски Албанци. Ни тоа не го бива, ама само замислете го пред следен пат да прашате и наредите нешто на ТИ“, напиша новинарот Александар Методијев.Остра реакција упати и новинарката Емилија Лазаревска:„Простак и кретен! Срам да ти е. Па мисли кој знае што направил. Која е оваа будала, што е овој? Срамота и овие околу него што си молчат. Затуцан еден, невоспитан. Па со „ти“ ѝ се обраќа на министерката, жена, веројатно е и повозрасна од него. Уф! Е во наше време ќе го „изедевме“ и немаше да му текне другпат да се појави, а не да изигрува шериф“.Фоторепортерката Арбнора Мемети оцени дека ваквото однесување не доликува на новинар:„Ова однесување „ти кажавме“ најмалку наликува на некој што себеси се нарекува новинар. Новинарството не е нешто локално и не може да се извршува само во маало. Сакал некој или не, македонскиот јазик е повеќе од неопходен за вршење на оваа професија“.Сличен став изрази и професорката и новинарка Искра Коровешовска:„Факти: Тетово е во Македонија, точка. Во Тетово официјален јазик е македонски, точка. „Ти кажавме министерке кога ќе дојдеш во Тетово да си земеш преведувач“ е чаршиски муабет, за пред кооперација, не за јавен настап на новинар пред камера, точка“.На темата се огласи и новинарката Милка Смилевска:„Дел од новинариве не разбираат дека се пример во општеството и креатори на јавно мислење и не мислат што зборуваат. Зборот на новинарот има тежина. Не разбираат дека мирот нема цена. Дека само во мир и демократија можеме да имаме живот во Македонија. Не ширете омраза и нетрпеливост. Не личи на новинари да се ограничени и заостанати во некои националистички наративи. Ги сакам и почитувам сите јазици и граѓани и граѓанки“.Со реакција излезе и новинарот Кристијан Ландов:„Она што се случи во Тетово не е ништо поврзано со новинарство, туку со некултура. Прво обраќањето на „ти“ кон носител на јавна функција, личност која е години и години повозрасна од Вас... И втора работа „ти кажавме да си земеш преведувач“ во најмала рака е спорно бидејќи нема што новинар да и кажува на било која личност, на било кој функционер што и како да прави. Туку може да праша и може да констатира дали дошол или не дошол со преведувач. Мислам дека ако ние сме тие кои треба да бидеме коректив на општеството, тоа што се случи во Тетово во најмала рака е недозволиво и заслужува извинување“.Реакциите продолжуваат, а случајот повторно ја отвори дебатата за професионалните стандарди и однесувањето во новинарството.

Македонија | пред 1 месец