Јаневска им посака добредојде на бруцошите на УКИМ: „Вие сте идните професионалци, иноватори и лидери“

Министерката за образование и наука Весна Јаневска им посака добредојде на новите студенти на Универзитетот „Св. Кирил и Методиј“ во Скопје, порачувајќи им дека токму младите се најголемиот потенцијал што го има Македонија.

На свеченото одбележување на почетокот на академската година, Јаневска ги охрабри студентите активно да го користат академскиот живот и можностите што ги нуди универзитетот.

— реклама —

„Овие млади луѓе избрале со високо образование да ги остварат своите амбиции и да се подготват за идните професионални и животни предизвици. Универзитетот „Св. Кирил и Методиј“ е вистинското место за учење, поставување прашања и истражување. Бидете љубопитни и храбри во потрагата по нови знаења“, рече Јаневска.

Таа посочи дека покрај предавањата и испитите, студентите имаат можност да учествуваат во истражувања, научни проекти, академски размени, летни школи и обуки.

— реклама —

„Вие сте идните професионалци, иноватори и лидери кои ќе ја градат иднината на државата. Токму затоа високото образование е еден од нашите најважни приоритети“, истакна министерката.

— реклама —

Јаневска информираше дека се спроведени евалуации на дел од постојните студиски програми, а се акредитирани и нови, со цел усогласување на високото образование со европските стандарди и потребите на општеството.

Во однос на студентскиот стандард, таа посочи на реконструкцијата на студентските домови „Стив Наумов“ и „Кузман Јосифовски Питу“ во Скопје, како и на најавената модернизација на останатите домови.

Јаневска го најави и новиот конкурс за студентски стипендии, кој ќе опфати и нови категории корисници, меѓу кои студенти со ретки болести и посебни образовни потреби.

На крајот, таа ги повика студентите активно да учествуваат во академскиот живот, да ги споделуваат своите предлози и иницијативи и да придонесуваат во создавањето подобри услови за студирање.