Во изминатите две години во образовната инфраструктура се вложени 70 милиони евра преку повеќе од 90 проекти, информираше министерката за образование и наука Весна Јаневска од собраниската говорница.
Како што посочи Јаневска, подобрувањето на условите во училиштата е еден од приоритетите на Министерството за образование и наука, со инвестиции во училишни објекти, спортски сали, опрема и инфраструктура за инклузија.
„Само преку Министерството вложивме 35 милиони евра во 7 нови училишни објекти, 4 нови спортски сали и реконструкција на 30 постоечки училишни и спортски објекти“, рече Јаневска.
Во рамки на овие средства, според министерката, се опфатени и реконструкција на два студентски дома, како и продолжување на изградбата на објектите на ФИНКИ и ФФК.
Дополнителни 35 милиони евра им биле доделени на општините преку два повика за финансирање капитални инвестиции, со кои треба да се реализираат уште 55 проекти.
Јаневска информираше и дека за воведување едносменска настава се прошируваат капацитетите во 14 училишта во Центар, Карпош, Аеродром, Ѓорче Петров, Бутел, Гази Баба, Кисела Вода, Илинден и Градско. Дополнително, уште 15 проекти треба етапно да започнат во следните неколку месеци.
Планирана е и изградба на 30 нови спортски сали, реконструкција на преостанатите државни студентски домови, како и на шест училишта со ресурсни центри. Според Јаневска, средствата за овие активности веќе се обезбедени.
Министерката оцени дека резултатите од вложувањата во изминатите две години можат да се споредат со периодот пред нив и со реализацијата на инфраструктурните проекти во образованието.
