Јаневска ветува зголемување на студентскиот оброк, студентите чекаат детали

Зголемување на државната субвенција за студентски оброк ќе има, но сè уште не се знае колкав ќе биде новиот дневен износ и кога ќе почне да се применува. Министерката за образование и наука Весна Јаневска денеска порача дека ќе се најде решение за барањето на студентите субвенцијата од 140 да се зголеми на 200 денари дневно.

— реклама —

Едно од решенијата што се разгледуваат е воведување ваучери наместо платежни картички, со кои студентите би можеле да купуваат исклучиво храна. Студентските претставници најавија дигитален референдум на кој ќе се изјаснат за предлогот.

— реклама —

По вчерашната средба со премиерот Христијан Мицкоски и министерката Јаневска, како можен пример беше посочен системот што се применува во Словенија. Според Јаневска, ваучерите би важеле кај одредени оператори што ќе продаваат храна.

„Зголемување секако ќе има; која ќе биде сумата, дополнително ќе се договориме“, изјави Јаневска, додавајќи дека верува оти ќе биде пронајдено решение со кое сите ќе бидат задоволни.

— реклама —

Студентите ја поднесоа иницијативата за зголемување на субвенцијата на почетокот на академската година. Јаневска претходно посочи дека со поранешното раководство на Универзитетското студентско собрание при Универзитетот „Св. Кирил и Методиј“ било договорено да се прошири кругот на студенти што имаат право на субвенциониран оброк, наместо да се зголеми дневниот износ.

Според министерката, опфатот веќе е проширен согласно со договореното, а за новото барање се бара дополнително решение.