„Ранг-листите се објавени“: Јаневска одговори на обвинувањата дека се прикриваат резултатите од приемот во студентските домови

Министерката за образование и наука Весна Јаневска реагираше на обвинувањата дека се прикриваат резултатите од приемот во студентските домови, нагласувајќи дека кандидатите можат да ги видат објавените ранг-листи и причините за неприем.

— реклама —

Јаневска, одговарајќи на новинарско прашање во врска со критиките од Левица, рече дека се објавени листите на примените и непримените студенти, при што кај оние што не се примени е наведено и зошто биле одбиени.

„Жалосно е што во јавноста се шират дезинформации. Ранг-листите се објавени, како за примените, така и за непримените, со објаснување зошто не се примени“, рече Јаневска.

— реклама —

Како примери, таа посочи студенти што студираат седма или осма година, како и кандидати чии родители имаат високи приходи. Според неа, условите и критериумите за прием биле јавно објавени во огласот.

— реклама —

Во однос на состојбата со образовните асистенти, Јаневска изјави дека нивниот број во училиштата е најголем досега. Во основното образование има околу 1.348 асистенти, а во средното 166.

Дополнителните барања за ангажирање асистенти се разгледуваат, додека конкурсот сè уште е во тек. Министерката посочи дека учениците имаат поддршка и од инклузивните тимови и дека се преземаат активности за обезбедување на потребната асистентска поддршка.

Јаневска соопшти и дека во Основното училиште „Киро Глигоров“ се очекува наскоро да започне наставата со физичко присуство. Според најавата, дополнителните училници треба да бидат завршени во текот на викендот, по што сите ученици би требало да се вратат во училишните клупи најдоцна од вторник.