Јаневска најави унапредување на наставните содржини за сообраќајна безбедност

Образованието и воспитувањето од најрана возраст се меѓу главните предуслови за поголема безбедност на патиштата, истакна министерката за образование и наука, проф. д-р Весна Јаневска, на промоцијата на Националната стратегија за безбедност на сообраќајот на патиштата 2026–2030.

— реклама —

Според Јаневска, новата стратегија го препознава значењето на образовниот систем во развивањето сообраќајна култура и одговорно однесување кај младите учесници во сообраќајот. Таа нагласи дека знаењата и навиките за безбедно учество треба да се стекнуваат уште во предучилишниот период и да се надградуваат низ сите степени на образованието.

Темите за сообраќајна безбедност веќе се обработуваат преку наставни и воннаставни активности, како и преку кампањи што се спроведуваат во соработка со МВР, стручни организации и општините. Сепак, министерката посочи дека податоците за сообраќајните незгоди покажуваат оти е потребен уште посилен и покоординиран пристап.

— реклама —

Министерството за образование и наука, заедно со Бирото за развој на образованието, ќе работи на дополнување на образовните содржини, со цел учениците да стекнуваат практични знаења, да ги препознаваат опасностите и да развиваат навики за одговорно однесување и користење заштитна опрема.

— реклама —

Предвидено е и унапредување на компетенциите на наставниците, како и обезбедување современи едукативни материјали. Јаневска ја поддржа и иницијативата за создавање побезбедни зони околу училиштата, парковите и центрите на населените места, преку соработка со општините и граѓанскиот сектор.

Таа посочи дека младите треба да се обучуваат и за правилно постапување во првите критични минути по сообраќајна незгода, во соработка со Црвениот крст и здравствените институции.

— реклама —

Министерката порача дека создавањето трајна култура на безбедност е заедничка одговорност и дека успешното спроведување на стратегијата ќе зависи од координираното дејствување на сите надлежни институции и засегнати страни.