Над 10.800 средношколци учат според модернизирани наставни програми, во кои се вклучени СТЕМ-компетенциите, зелените и дигиталните вештини во сите струки

Развивањето современи вештини кај учениците и воспоставувањето функционален систем за кариерно советување се меѓу главните приоритети на образовната реформа, истакна министерката за образование и наука Весна Јаневска на настан организиран од ИНОВА.

— реклама —

Настанот е посветен на запознавање на средношколците со деловниот свет, современите професии, можностите за започнување сопствен бизнис и вештините потребни за успех во денешното деловно опкружување.

Јаневска посочи дека брзиот технолошки развој, вештачката интелигенција, зелените иновации и дигиталната трансформација создаваат нови можности, но бараат и нови знаења и квалификации за младите полесно да се вклучат на пазарот на трудот.

— реклама —

Во рамки на реформите, од оваа учебна година повеќе од 10.800 ученици во прва година средно стручно образование следат модернизирани наставни програми, во кои се вклучени СТЕМ-компетенциите, зелените и дигиталните вештини во сите струки. За спроведување на новините се обучени 569 наставници, а дополнително е зајакната соработката со приватниот сектор.

— реклама —

Важен дел од реформите е и кариерното советување. Со измените на законската регулатива и соодветните подзаконски акти, оваа област е системски уредена во училиштата. Воспоставени се регистри на координатори за професионална ориентација во основните училишта и на кариерни советници во средните училишта. Во нив се евидентираат стручни соработници и советници кои поминале соодветни обуки за да им помогнат на учениците при изборот на понатамошното образование и професионалниот развој.

„Не ни е целта само да ја оствариме реформската агенда на хартија, туку да создадеме функционален систем на кариерно советување што вистински ќе им помага на младите да го пронајдат својот пат“, порача Јаневска.

— реклама —

Министерката изрази очекување дека средбите со успешни професионалци ќе ги инспирираат средношколците да ги препознаат своите интереси и таленти и да ја градат својата образовна и професионална иднина во Македонија.