Јаневска во Брисел: ја стимулиравме националната научно-истражувачка дејност, сега работиме на регионално и глобално поврзување

Македонија ги насочува напорите кон поврзување на научно-истражувачката дејност со регионалните и глобалните мрежи, откако во изминатиот период беа преземени мерки за зајакнување на националниот иновациски систем. Ова го истакна министерката за образование и наука Весна Јаневска на министерскиот состанок на Управувачката платформа за истражување и иновации за Западен Балкан, што се одржува во Брисел во организација на Европската комисија.

Јаневска посочи дека за краток период буџетот за наука бил двојно зголемен, била воспоставена нова стратешка рамка, подготвени нови законски решенија и модернизирана националната истражувачка инфраструктура.

— реклама —

Таа информираше дека е формиран Национален совет за иновации, претприемништво и технолошки развој, задолжен за координација на националните активности, како и посебна Агенција за иновации, научно-технолошки развој и претприемништво, која треба да го олесни пристапот до средства и услуги за компаниите, истражувачите и иноваторите.

— реклама —

Според Јаневска, во Македонија функционираат седум центри за трансфер на технологии, пет технолошки инкубатори и еден приватен научно-технолошки парк. Во тек е и основање виртуелен научно-технолошки парк и првиот технолошки парк под целосна надлежност на државата. Таа го посочи и проектот „ВЕЗИЛКА“, кој е првата национална контактна точка во европската мрежа на фабрики за вештачка интелигенција.

Како еден од главните приоритети, министерката го нагласи намалувањето на одливот на мозоци и создавањето услови младите истражувачи да останат во земјата и да го развиваат својот потенцијал.

— реклама —

Јаневска оцени дека земјите од Западен Балкан се соочуваат со слични предизвици во науката и истражувањето, но имаат и можност за заеднички пристап во нивното надминување.

Таа додаде дека националните стратегии за паметна специјализација, заедно со Планот за раст и реформската агенда, се важни документи за поттикнување на науката и истражувањата, зголемување на продуктивноста и економскиот раст во регионот.

На состанокот во Брисел Јаневска учествуваше во дебати за креирање политики за поддршка на иновациите и за добри практики во истражувањето. Во текот на денот е предвидена и нејзина билатерална средба со европската комесарка за стартапи, истражување и иновации, Екатерина Захариева.