Ваучери за храна наместо пари, предлог на Министерството за образование за студентскиот оброк

Министерката за образование и наука Весна Јаневска очекува наскоро да биде постигнат договор за студентскиот оброк. Таа најави продолжување на разговорите со студентските претставници, како и средба со премиерот и студентите.

— реклама —

Јаневска посочи дека студентите побарале зголемување на износот, но објасни дека со претходното раководство на студентските собранија било договорено да се прошири опфатот на корисници наместо да се зголеми сумата. Според неа, со новото раководство има одредени разлики во ставовите, но верува дека наскоро ќе се најде решение.

— реклама —

Како една од можностите, Министерството предложило ваучерски систем сличен на оној во Словенија. Ваучерите би можеле да се користат во сендвичарници, пекари и ресторани за купување храна, со цел средствата да бидат наменети исклучиво за субвенционирање на оброк.

— реклама —

Министерката рече дека институциите се подготвени да продолжат со разговорите за да се најде прифатливо решение за студентите.

Во однос на барањата за бесплатен јавен и меѓуградски превоз, Јаневска појасни дека јавниот превоз не е во надлежност на Министерството за образование и наука. Таа додаде дека во моментов нема законска можност за бесплатен меѓуградски превоз за студентите, но ова прашање може да се разгледува во иднина, во консултација со нив.