Околу 100 талентирани ученици кои годинава ја претставувале Македонија на меѓународни научни олимпијади и престижни ученички натпревари денеска беа примени од претседателката Гордана Сиљановска-Давкова и министерката за образование и наука Весна Јаневска.
На средбата учениците добија порака дека нивните успеси се гордост за државата, а институционалната поддршка за талентираните млади ќе продолжи да се зголемува.
„Се радувам што од година во година евидентираме сè повеќе талентирани млади со желба за натпревар, кои сакаат да ја претставуваат државата надвор и со гордост го прават тоа. За мене тоа е вистински патриотизам и затоа продолжете да бидете репрезенти на татковината“, рече Јаневска.
Таа им честиташе на сите ученици кои годинава учествувале на меѓународни натпревари, особено на оние кои освоиле високи награди и признанија.
Од Министерството за образование и наука информираат дека во изминатите три години значително е зголемена финансиската поддршка за талентираните ученици. Трошоците за патување и котизациите за учество на меѓународни натпревари во целост ги покрива Министерството, со што семејствата се ослободени од финансискиот товар.
За оваа намена минатата година биле издвоени пет милиони денари, додека годинава досега се исплатени три милиони денари.
Јаневска нагласи дека сите ученици се подеднакво важни и дека институциите имаат обврска да обезбедат квалитетно образование и еднаков пристап до образовните можности. Сепак, според неа, талентираните деца имаат потреба од дополнително внимание за целосно да ги развијат своите способности и да ги остварат личните амбиции.
Министерката потсети и на мерките што Министерството ги спроведува за нивна поддршка. Редовно се објавуваат повици за финансиски награди за освоени високи места и медали на меѓународни натпревари, како и за први места на државните натпревари.
Дополнително, се доделуваат стипендии за талентирани средношколци, а во тек е и изработка на Концепција за детектирање и работа со талентирани деца.
