Учениците во ООУ „Киро Глигоров“ во Центар наскоро ќе имаат услови за настава во една смена, откако ќе завршат градежните активности за проширување на училишниот капацитет. Министерката за образование и наука Весна Јаневска очекува работите да бидат завршени за неколку дена, со што сите ученици ќе можат да следат поквалитетна настава во една смена.
Одговарајќи на пратеничко прашање во Собранието, Јаневска објасни дека Министерството за образование и наука навреме поднело барање за реализација на проектот, но одобрението од општинската администрација било добиено по повеќе од два месеца, односно кон крајот на јули. Поради тоа, како што рече, градежните работи доцнат неколку дена, а дел од учениците во моментов следат настава од далечина.
Јаневска нагласи дека проширувањето на училишните капацитети се реализира секаде каде што има потреба. За ООУ „Киро Глигоров“ рече дека станува збор за училиште изградено во периодот на владеењето на СДСМ, но без предвидени доволни капацитети за очекуваниот раст на бројот на жители во Општина Центар.
Таа оцени дека актуелната Влада сега го решава проблемот со недостигот на простор, додавајќи дека не треба да се создава проблем таму каде што, според неа, нема таков.
Јаневска повторно повика образованието да биде надвор од дневнополитичките пресметки и порача дека е потребно единство при креирањето на образовните политики, особено со оглед на резултатите што македонските ученици ги постигнуваат на меѓународните тестирања, меѓу кои и ПИСА.
Во однос на затворените училишта, министерката објасни дека дел од нив биле затворени поради недостиг на ученици, додека училиштата со многу мал број ученици биле споени со други во рамките на процесот на оптимизација.
Повикајќи се на податоци од УНИЦЕФ и Светската банка, Јаневска рече дека во земјата има вишок од 1.800 паралелки и 3.000 наставници. Во текот на оваа година, како што посочи, биле споени 430 паралелки, но ниту еден наставник не го изгубил работното место.
Јаневска се осврна и на состојбата во ООУ „Петар Здравковски – Пенко“ во Општина Бутел. Таа рече дека предизвикот е надминат и дека не се намалува бројот на паралелки. Како и минатата учебна година, и оваа година има четири паралелки на албански јазик.
На учениците од Општина Чаир кои веќе имаат брат или сестра во училиштето, им бил овозможен упис, додаде министерката.
