Спречувањето на врсничкото насилство, подобрувањето на квалитетот на наставата и безбедноста на учениците се меѓу приоритетите на Министерството за образование и наука, посочи министерката Весна Јаневска, одговарајќи на новинарски прашања по повод поставувањето камен-темелник за нова спортска сала во ООУ „Братство“.
Јаневска рече дека Министерството планира континуирани активности за спречување на врсничкото насилство и создавање стабилен систем кој ќе дејствува превентивно. Според неа, Владата досега презела повеќе проекти, законски измени и промени во училиштата, со цел насилството да се спречува и санкционира.
„Презедовме проекти и законски измени. Презедовме промени во училиштата во однос на распоредот на наставниците, грижата, па дури и казни за оние родители чии деца ќе повторуваат врсничко насилство“, изјави Јаневска.
Таа нагласи дека активностите нема да бидат еднократни, туку треба да доведат до воспоставување стабилен систем за превенција и справување со врсничкото насилство.
Во однос на бесплатниот меѓуградски превоз за студентите, Јаневска појасни дека таква мерка во моментов не е предвидена. Студентите, како што рече, имаат обезбеден бесплатен превоз во градовите.
Министерката потсети дека основното и средното образование се бесплатни, додека високото образование се плаќа со минимална партиципација. Таа посочи дека студентите имаат можност да се запишат на шест државни универзитети.
Како еден од главните приоритети Јаневска го издвои подобрувањето на квалитетот на образованието преку воведување едносменска настава, целодневна настава за помалите ученици, промени во наставните планови и програми во високото образование и носење нов закон за високото образование.
Во врска со топлотниот бран, министерката рече дека Скопје во моментот не е во портокалова фаза. Таа посочи дека постојат утврдени процедури и дека, доколку условите го наложат тоа, ќе бидат преземени соодветни мерки. Јаневска апелираше учениците, родителите и наставниците да не преземаат мерки самостојно, бидејќи, како што рече, Министерството навреме ќе реагира доколку има потреба.
Во однос на ООУ „Киро Глигоров“, каде дел од наставата се одвива онлајн поради градежни работи, Јаневска објасни дека одлуката е донесена првенствено заради безбедноста на учениците.
Според неа, краткиот период на онлајн настава е оправдан ако со тоа се обезбедуваат подобри услови за учење во иднина. Таа посочи дека градежните работи сè уште траат и дека во училиштето има работници, поради што е проценето дека наставата од далечина е најбезбедно решение.
„Бенефитот што учениците во „Киро Глигоров“ ќе го имаат отсега во следните 20 години е несразмерно поголем од оној што децата две недели ќе учат онлајн“, рече Јаневска.
Таа додаде дека евентуална промена на организацијата на наставата во училиштето не е одлука на Министерството, туку за тоа треба да разговараат директорката и градоначалникот, доколку сметаат дека условите се безбедни.
