Јаневска: со двојно зголемен буџет во период од две години, значително ја раздвиживме науката во Македонија

Поголемите вложувања во научно-истражувачката дејност, меѓународната соработка и подготовката на нова законска рамка се дел од мерките со кои Владата настојува да ги унапреди науката и високото образование во Македонија. Ова го истакна министерката за образование и наука, проф. д-р Весна Јаневска, на отворањето на четвртиот Интернационален медицински конгрес во Скопје.

Конгресот го организира Факултетското студентско собрание при Медицинскиот факултет на Универзитетот „Св. Кирил и Методиј“, а Јаневска во своето обраќање нагласи дека меѓународното поврзување и мобилноста се особено важни за високото образование, науката и истражувањата. Според неа, преку нив се овозможуваат размена на искуства и добри практики, како и реализација на заеднички проекти со меѓународни партнери.

— реклама —

„Како Влада имаме став дека без наука нема општествен развој, па оттука, кога пред две години го започнавме раководењето со институциите, одлучивме да преземеме крупни мерки кои ја раздвижија научно-истражувачката дејност во Македонија“, рече Јаневска.

— реклама —

Таа посочи дека за две години буџетот за наука е зголемен повеќе од двојно. Во 2025 година биле финансирани околу 50 научно-истражувачки проекти од јавен интерес, во вкупна вредност од шест милиони евра. Дополнително, на професорите, научниците и студентите им бил обезбеден бесплатен пристап до меѓународните научни бази „Web of Science“ и „Scopus“.

Министерката ја истакна и засилената соработка со Здружениот истражувачки центар на Европската комисија, чии лаборатории им се достапни на македонските научници и истражувачи. Со поддршка на Центарот, минатиот месец во Македонија била организирана и првата летна научна школа за земјите од Западен Балкан.

— реклама —

Јаневска информираше и дека е подготвена целосно нова законска рамка за науката и високото образование. Пакетот од три закони веќе е во собраниска постапка, а министерката очекува тие да бидат усвоени до крајот на годината.

Според неа, новите законски решенија треба да овозможат повеќе можности за професорите, научниците и истражувачите, но и за младите кадри што се вклучуваат во наставно-научната и истражувачката работа. Таа додаде дека најдобрите студенти, добитници на инженерски прстен или други признанија за успех, добиваат предност при вработување на факултетите.

Посакувајќи успешна работа на конгресот, Јаневска им порача на професорите и студентите да продолжат да придонесуваат за унапредување на образованието и развојот на научната мисла во медицината, со цел да се поддржат и напорите за подобрување на здравствениот систем и здравјето на граѓаните.