Јаневска: Инклузијата ја градиме сите, да научиме по нешто од знаковниот јазик

Инклузијата во образованието бара заеднички ангажман, а познавањето на знаковниот јазик може да биде важен чекор кон полесна комуникација со лицата со оштетен слух, порача министерката за образование и наука Весна Јаневска.

На одбележувањето на Меѓународниот ден на знаковниот јазик во државното средно училиште со ресурсен центар „Партенија Зографски“, Јаневска истакна дека наставниците покажуваат оти за секое дете може да се најде соодветен начин на комуникација, согласно неговите можности.

— реклама —

Таа посочи дека децата со посебни образовни потреби имаат потенцијал за постигнувања доколку добијат соодветна поддршка од семејството, училиштето и средината во која растат.

„Знаковниот јазик им помага да се ‘слушнат’ меѓу себе и нив да ги ‘чујат’ другите. Тој им го олеснува образованието“, рече Јаневска.

— реклама —

Министерката додаде дека Министерството работи на отстранување на бариерите во образованието преку соработка со училиштата со ресурсни центри, обезбедување дидактички материјали и асистивна технологија, како и поддршка за употребата на знаковниот јазик. Таа посочи и дека се спроведуваат континуирани обуки за наставниците.

— реклама —

Јаневска нагласи дека Македонија е потписничка на Конвенцијата за правата на лицата со попреченост, која ги утврдува принципите на инклузија и недискриминација и вклучување на децата и младите со попреченост во образовниот систем.

Според неа, потребни се дополнителни напори за промена на ставовите кон лицата со попреченост и подигнување на свеста за нивните права.

„Секој од нас може да направи чекор за приближување кон лицата со оштетен слух така што ќе научи по нешто од знаковниот јазик“, порача Јаневска.

Таа додаде дека подобрувањето на инклузивноста и пристапноста не е само задача на институциите, туку и индивидуална одлука на секој човек.