Јаневска: сите реформи се итни – работиме на подобрување на квалитетот на образованието и усогласување со пазарот на труд

Подобрувањето на квалитетот на образованието и неговото поголемо усогласување со потребите на пазарот на труд се меѓу приоритетите на реформите што се спроведуваат, порача министерката за образование и наука Весна Јаневска.

Јаневска учествуваше на панел-дискусија посветена на Извештајот за раст и работни места што Светската банка го изготви за Македонија. На дискусијата, на која присуствуваа претставници на Владата, академската и бизнис-заедницата, министерката посочи дека укажувањата за потребата од подобрување на квалитетот на образованието се основа за промените што се спроведуваат од основното до високото образование.

„Фокусирани сме на отстранување на системските слабости и сите реформи се итни, затоа што како земја во развој немаме комоција за губење човечки потенцијал“, рече Јаневска, говорејќи за промените потребни за полесен премин од образованието кон работното место.

— реклама —

Таа посочи дека во изминатите две години во образовната инфраструктура се вложени 70 милиони евра, а паралелно се набавуваат нови наставни програми и учебници. Според Јаневска, се работи и на зголемување на мотивацијата на наставниот кадар преку раст на платите, како и преку поголеми можности за кариерен и професионален развој.

Во основното образование се спроведува програма за професионална ориентација, додека во средните училишта се номинираат кариерни советници кои треба да им помогнат на младите при изборот на области за кои имаат потенцијал.

— реклама —

Дигиталните вештини и вештачката интелигенција се вклучени во повеќе наставни програми, а се работи и на интегрирање вештини поврзани со зелената транзиција.

Како особено важен модел Јаневска го посочи дуалното образование во средните стручни училишта, за кое рече дека ќе продолжи да се проширува и во повеќе училишта, но и на повисоко образовно ниво.

„Дуалното средно образование го реализираме во соработка со германската и швајцарската развојна агенција, Шведска и Австрија, и за овие кадри речиси во целост има обезбедено вработување кај работодавачите каде се реализирале практичното образование и обуката“, рече министерката.

— реклама —

Таа додаде дека дел од факултетите веќе се поврзуваат со компании и ги испраќаат студентите на практична обука кај потенцијални работодавачи, оценувајќи дека сличен модел може да даде ефект и во високото образование.

Јаневска се осврна и на новиот Предлог-закон за високото образование, со кој се предвидува воведување стручни студии од прв циклус, специјалистички стручни студии од втор циклус и кратки стручни студии. Законот е во собраниска процедура, а министерката очекува да биде усвоен, по што примената би требало да ја зајакне врската меѓу образованието и пазарот на трудот.

— реклама —

Таа нагласи дека претстои и работа со академската заедница околу обезбедувањето релевантност на студиските програми и следењето на исходите на дипломираните.

„Цел е да го вклучиме потенцијалот на младите во обликување на иднината, нивната, но и нашата заедничка“, истакна Јаневска.

На панел-дискусијата се обратија и министерот за дигитална трансформација, член на Извршниот комитет и секретар за меѓународна соработка на ВМРО-ДПМНЕ Стефан Андоновски, заменик-амбасадорот на ЕУ во Македонија Бен Нупнау и Виктор Мизо од компанијата „Костал“. Претходно, на презентацијата на Извештајот воведно обраќање имаше премиерот Христијан Мицкоски.