Јаневска најави казни и за родителите: Ќе се воспостави систем за спречување на насилството во училиштата

Министерството за образование и наука најавува долгорочен и системски пристап во справувањето со меѓуврсничкото насилство во училиштата, со конкретни мерки, законски измени и поголема одговорност за сите што се вклучени во процесот.

Министерката за образование и наука, Весна Јаневска, посочи дека се предвидени повеќе активности за спречување на насилството, вклучително и промени во организацијата на работата во училиштата, поголема грижа за учениците, но и санкции за родителите чии деца повторно вршат насилство.

— реклама —

„Ова е првата Влада која посвети толку многу внимание на насилството меѓу врсниците. Презедовме проекти и законски измени. Направивме промени во училиштата во однос на распоредот на наставниците, грижата, дури и казни за оние родители чии деца го повторуваат насилството меѓу врсниците“, изјави Јаневска.

— реклама —

Таа информираше дека во тек се разговори со Градот Скопје, засега на ниво на службите, а понатаму се очекуваат разговори и со градоначалникот. Според Јаневска, целта е мерките да не останат на ниво на краткорочни проекти, туку да се воспостави одржлив систем кој континуирано ќе работи на спречување и третирање на насилството меѓу учениците.

На темата се огласи и владејачката ВЛЕН, од каде што најавија иницијатива за нулта толеранција кон насилството во училиштата. Иницијативата предвидува соработка меѓу општините, училиштата, психолозите, наставниците и родителите.

— реклама —

Од ВЛЕН информираат дека Општина Чаир веќе ги презела првите чекори за создавање работна група, која ќе се занимава со спречување и третирање на случаите на насилство меѓу учениците.

„Општина Чаир ги презеде првите чекори за создавање платформа која ќе ги обедини општината, училиштата, психолозите, наставниците и родителите. Ние се залагаме овој пристап да се спроведе и во општините каде што раководиме, додека ги повикуваме и другите општини да се приклучат кон оваа иницијатива“, изјави Теута Идризи.

Според податоците наведени во информацијата, во периодот од 22 јули до 20 август, полицијата во Македонија регистрирала 973 случаи на насилство. По семејното насилство, меѓуврсничкото насилство е меѓу најчестите регистрирани случаи.