35 српски офицери обвинети во Косово за убиството на цивили при нападот врз куќата на Адем Јашари

Косовското Специјално обвинителство поднесе обвинение против 35 лица од поранешните командни структури на специјалните единици на српската полиција, кои ги товари за воени злосторства против цивилното население во Преказ во март 1998 година.

— реклама —

Обвинението се однесува на настаните од 5, 6 и 7 март 1998 година во населбата Јашари во Долно Преказе. Според Обвинителството, во нападот биле убиени 26 цивили, меѓу кои имало деца, жени и постари лица. Наводно, дел од цивилите биле извадени од своите домови и малтретирани.

— реклама —

Според косовските обвинители, 35-те обвинети имале високи командни позиции во тогашните структури на специјалните единици на српската полиција и биле вклучени во планирањето, организирањето и координирањето на операцијата. Обвинението е поднесено во отсуство, бидејќи, како што наведува Обвинителството, биле исцрпени можностите за обезбедување на нивното присуство во постапката.

— реклама —

Ова е прво обвинение на косовското Специјално обвинителство кое директно се однесува на убиствата на цивили во населбата Јашари во Преказ. Сега Основниот суд во Приштина треба да одлучи за обвинението и доказите што ги доставило Обвинителството.

Во истата операција беше убиен и Адем Јашари, еден од основачите и командантите на ОВК, заедно со голем број членови на неговото пошироко семејство.