5,5 милиони евра – оваа година лото-добивката се падна кај Мицкоски, вели СДСМ

СДСМ продолжува со обвинувањата за трошењето на парите од АД „Државна лотарија“ за одбележувањето на 35 години независност и бара да бидат објавени документите и деталите за тоа како биле потрошени 5,5 милиони евра.

Од партијата излегоа со низа прашања за изборот на компаниите, работата на комисијата во Државна лотарија, исплатите кон изведувачите и ангажманот на Дејвид Гета, а премиерот Христијан Мицкоски и власта ги обвинија за прикривање на трошењето.

„Оваа година лото-добивката – се падна кај Мицкоски и неговата Организирана криминална група. 5,5 милиони евра преку криминални договори кои Мицкоски сакаше да ги сокрие дека се ‘нула денари’“, обвинија од СДСМ.

— реклама —

Од опозициската партија тврдат дека станува збор за „огромни народни пари“ и бараат јавноста да добие целосен увид во документацијата и исплатите.

„Тоа се 5,5 милиони причини граѓаните да ја знаат целата вистина, да ги видат документите и да добијат одговори каде завршија нивните пари“, велат од СДСМ.

Партијата бара одговор кои компании добиле милионски суми и според кои критериуми биле избрани, но отвора прашања и за тричлената комисија во Државна лотарија која одлучувала за изборот на фирма за прославата.

— реклама —

„Како била избрана тричлената комисија во АД ‘Државна лотарија’, која одлучувала за изборот на фирма за прославата? Како е можно претседателот на таа комисија истовремено да се јавува и како автор на оркестрациите и аранжманите за концертот?“, прашуваат од СДСМ.

Дополнително, бараат да се објави врз основа на кои критериуми биле ангажирани, како што ги нарекуваат, „фирми-ќерки“, колку пари добиле преку Државна лотарија, како и колку средства биле потрошени за провизии и проценти.

— реклама —

СДСМ бара податоци и за исплатите кон изведувачите – кога биле извршени и во колкав износ, а посебно го отвора прашањето за ангажманот на светски познатиот диџеј Дејвид Гета.

„Дали со Гета сè било претходно договорено, уште пред да биде завршен јавниот повик и пред да се знае кој ќе биде избран на тој повик?“, прашуваат од партијата.

Обвинувањата доаѓаат откако директорот на Државна лотарија, Александар Климовски, јавно потврди дека во договорот за организацијата на прославата биле предвидени 300 милиони денари. Тој претходно објасни дека станува збор за нераспределена добивка на компанијата од 2024 година и тврдеше дека средствата во моментот на нивното користење не биле буџетски, туку корпоративни пари на Државна лотарија.

— реклама —

Климовски потврди и дека јавниот повик траел пет дена, иако, според неговото толкување, Лотарија немала законска обврска воопшто да објавува таков повик. На него пристигнала една понуда – од „Стардас ДООЕЛ Скопје“, правниот субјект преку кој настапува „Авалон Интернешнл Букинг“.

Од СДСМ, сепак, оценуваат дека околностите создаваат сомнеж за проневера на пари и бараат одговори за целата финансиска конструкција.